Latest News

Tripura atangin Bru chhungkua 218 hruaikir tawh

Tripura Bru Relief camp-a Mizoram khua leh tui awmte Mizorama hruaikir thawh 9-na kal mekah nimin thleng khan chhungkaw 218 chu Mizoram-ah hruai kir an ni tawh.
Tarlan tawh thin angin Bru lak kir thawh 9-na hi thla hmasa October ni 3 attng khan tan a ni a, nimin thleng khan chhungkaw 218-a mi 881 hruaikir an ni tawh a, heng hruaikirte hi Mamit District mi chhungkaw 133-a mi 551, Kolasib District mi chhungkaw 16-a mi 68 leh Lunglei District mi chhungkaw 69-a mi 262 te an ni.
Sawrkar thuneitute hnen atanga thu-dawn danin sawrkar laipuiin Tripura Bru Camp-a chhawmdawlna, a thlawna buhfai an dawn thin a tihtawp chu pe chhunzawm leh tura sawrkar nawr nan October ni 31 atang khan Bru NGO ten kawngpui an danpin avangin Sawrkar Official-te chu Bru camp 3 - Asapara, Naisingpara leh Haza-cherra Camp-ah te an kal thei tawh lova, hemi avang hian hruaikir hna thawh pawh a muan phah hle. Heng Camp 3 atanga Mizoram-a hruai kir tawh zinga a tam zawk te pawh hi Relief Camp atanga hruaichhuah ni lovin anmahniin Kanhmun khua Facilitation Centre-a Liaison Officer (LO) hnenah an in-report a, hemi hmun atang hian an awmna tur khuaah hruai thin an ni.
Ruahman lawk dan chuan Bru hruaikir thawh 9-na hi tun thla ni 30 thleng neih tur a ni a, hemi chhung hian Mamit district mi leh sa chhungkaw 3368 hruaikir tura ruahman a ni.

Comments

Popular News (Last 30 Days)