Mipui ten lehkha chhiar an uar zel theihna turin Serchhip-ah ‘Reading Day’ hman a ni

SCERT kum 40 tlin lawmna chi khat atan nimin khan Serchhip DIET-ah lehkhabu chhiar a pawimawh zia inzirtirna atan lehkha chhiar Ni, Reading Day hman a ni a, he hun hi Serchhip District Bawrhsap, Sangchhin Chinzah chuan hmanpuiin lehkhabu chhiar chuan hriatna a tipung chauh ni lovin engkim zirna hmanrua a nih thu a sawi.

Serchhip DIET Office Tual-a Reading Day puala inkhawm tawi neih ah District Bawrhsap, Sangchhin Chinzah chuan tunlai khawvel-ah Information Technology lama hmasawnna sang tak avanga mi tam tak ten lehkhabu chhiar mang lova Mobile Phone leh thildang kan buaipui laia hetiang hun buatsaih a ni chu lawmawm a tih thu a sawi a. Naupan lai atanga lehkhabu, Mizo tawng leh Saptawng-a ziak te chhiar tam a pawimawh thu sawiin, heng lehkhabu chhiar a a awmzia hriatloh te hrefiah tura kan beihna thin chu kan nitin khawsakna kawngah thil tangkai tak a nih thu a sawi a. Lehkhabu chhiar chuan hriatna a tipung satliah mai ni lovin kan Thluak sawizawiin kan nitin khawsakna leh kan nunphung ah engkim zirna hmanrua a ni zawk tih a sawi.
Ama chanchin leh lehkha a zir thin dan te sawiin Bawrhsap chuan, zirna In-a lehkha a zir tawhloh hnua lehkhabu a chhiar te chuan Graduate a nih theihna atan leh Civil Service-a a luh theihna tura nasa taka a puih thu a sawi a. Mi thenkhat ten hunawl hnawhkhahna atana an hman thin te chu hunawl hnawhkhahna mai ni lovin kan hmalam hun lo kal tura tangkai tur zirna leh kan nun chhertu a ni thei tih a sawi a, naupang te pawhin an naupan lai atanga chin than ah an neih theihna tura nu leh pa te pawhin an kaihhruai a pawimawh thu a sawi a. Lehkha chhiar tam chuan hriatna dik leh tluantling min pe tih sawiin, chu chuan thuneihna leh thiltih theihna a ken tel thu a sawi a, lehkha chhiar uar zel turin he huna tel te chu a chah bawk.
Serchhip DIET, Serchhip District Academy of Letters (SEDAL) leh Zoram Entu Pawl (ZEP) te tangkawp in an buatsaih ‘Reading Day’ hi Serchhip DIET Principal, Lalrammawia chuan kaihruaiin ‘Back to the Book’ tih thu thupui-ah hman a ni a. He hunah hian SEDAL President, Lalhmangaiha Chawngthu leh Secretary, Laldinpuia te pawhin thu sawiin SEDAL President chuan Serchhip-ah hetianga lehkha chhiar a pawimawh zia inzirtira leh a huhova lehkha chhiarna hun hi buatsaih a la ni ngailo tih sawiin, hetiang hun buatsaih a ni chu lawmawm a tih thu a sawi a. Lehkhabu chhiar tam hi finna a nih thu sawiin thuziak leh chhiar lam uar deuh deuh a pawimawh thu a sawi bawk.
SEDAL Secretary, Laldinpuia pawhin thangthar te hi thuziah leh chhiar lamah hma kan sawn lo hle tih sawiin, Serchhip Tualchhung chan-chinbu-ah pawh Article ziak peih pawh kan awm mang tawhlo tih a sawi a, Social Media ringawt buaipui lova lehkhabu ziak leh chhiar lama kan thanharh thar leh a tul thu sawiin, kan YMA Library te chuan lehkhabu hawhtu a hmu zo mang tawh lova, Synod Bookroom leh Baptist Bookroom-ah te pawh lehkhabu chhiar tur lei an tlem mek zel ni a a lan thu a sawi bawk .
Reading Day-ah hian Serchhip DIET-a thawktute leh zirlaite, ZEP-a thawk te bakah Govt. Chanmari M/S-a zirtirtu leh zirlaite telin Serchhip DIET Library-a lehkhabu chi hrang hrang leh ZEP Resource Centre-a lehkhabu chi hrang hrangte chhawpchhuah a ni a, heng leh-khabu te hi kawt zawl-ah hian a chhiarna tur hmun siamin nileng in lehkhabu te hi an chhiar a ni.
Serchhip DIET-a thawk te chuan tunlai Information Technology hmasawn chak tak karah lehkhabu hlutna leh lehkhabu ngainatna tlahniam in lehkha kan chhiar tlem ta hle tih an sawi a. Hei vang hian lehkha chhiar tula leh pawimawh zia inzirtirna atan hetiang hun hi buatsaih an nih thu an sawi bawk.

Comments

Chhiar Hlawhte