Latest News

MHIP Sub-Hqrs. Serchhip te enkawl tur Swadhar Greh, Thlamuanna In hawn a ni

MHIP Sub-Hqrs.Serchhip te enkawl tur leh Hmeichhia chanhai te enkawlna tur, Swadhar Greh, Thlamuanna In ti-a a hming vuah chu nimin khan Serchhip District Bawrhsap, Sangchhin Chinzah chuan a hawng.
Serchhip IOC Veng-a Swadhar Greh hawnna hunah hian District Bawrhsap chuan Serchhip District chu Hmeichhe tamna a nih avangin hmeichhia harsatna tawk tanpuina hmun hi kan mamawh tih sawiin, chutih rualin hetiang hmuna enkawl ngai erawh tam lo thei se a duh thu a sawi a. Inchhung khur-a nu te pawimawhna sawiin Barwhsap chuan, kan khawtlang a sualna punlun zel tur veng-a tidanglam turin nu te pawimawh zia a sawi bawk a, Swadhar Greh chu tangkai taka hman a nih theih nan thawktu te duhsakna hlan in a hawng a ni.
MHIP Sub-Hqrs. President, Sanghmingliani kaihhruai he hunah hian MHIP General Hqrs. President, Lalthlamuani pawhin thu sawiin tuna hawn tak Swadhar Greh, MHIP Sub-Hqrs. Committee in 'Thlamuanna In' ti a hming an lo phuah chu a hming ang ngeia a mamawhtu te tan thlamuanna nise a duh thu a sawi a. He ruahmanna kalpui tura Nodal Department, Social Welfare Department in hetiang hmun enkawl thei tura MHIP te an ngai chu lawmawm a tih thu leh MHIP te pawh an pawl dinchhan ngaihtuaha insiamthat an ngaih thu te, 'Mite tanpui' tih Motto neitu an nih anga an din chhan te hre reng turin a chah a. MHIP ten Kumpuan atana 'Tu leh fate ruihhlo laka chhanhim' tih an hmang angin mahni hmazawn theuh ah theihtawp chhuah turin a chah a. “MHIP atanga midang tana malsawmna ni chung hian Pathian rawng i bawl ang u,” tiin, Thlamuanna In chu Taksa chauh ni lovin Thlarau chhanchhuahna nise a duh thu a sawi bawk.
Nimin-a Swadhar Greh hawnna hunah hian Serchhip ICDS Project-a CDPO, Lalbiakliana leh Serchhip SP, R. Sathiyasundaram IPS te bakah NGO dang aiawhte pawhin thu an sawi bawk.
Swadhar Greh hi Sawrkar laipui-a Ministry of Women & Child Development Scheme niin Mizoram District hrang hrangah NGO enkawlna hnuaiah din a ni a, Serchhip-ah hian MHIP Sub-Hqrs. Serchhip te hian an enkawl dawn a. August 1, 2019 atang khan Serchhip IOC Veng-a K. Chawiliana In-ah hna thawk tanin Hmeichhia tihduhdah tuar te enkawlna tur a ni a, Managing Board dinin thawktu mi 5 bakah Visiting Doctor pakhat lak fel a ni tawh a. Helai hmunah hian Khum 30 awm tur niin helai hmun pantute chu an thu a zirin kum 5 thleng awm thei dawn a, hemi chhung hian an ei leh in leh an mamawh te tum sak vek an ni ang.

Comments

Popular News (Last 30 Days)