Mamit-ah Hmeichhia te chen theihna tur hawng

Chhan hrang hrang avanga chenna tur mumal neilo hmeichhia ten an pan theih tur, Bethany Solace Home (Swadhar Greh) chu nimin khan Mamit-ah hawnna leh malsawmna neih a ni.
Mizoram sawrkar hnuaiah Women & Child Development hnuaia din, Bethany Solace Home (Swadhar Greh) hi Rev. Sister M. Joy, Provincial Superior (North East) chuan hawngin Most Rev. Stephen Rotluanga, Bishop of Aizawl chuan he Home hi malsawmna a nei a. Home hawngtu Rev. Sister M. Joy chuan Bethany Sister-te chu khawtlang tana an rawngbawlna hrang hrangah lawmthu hrilhin, hmangaihna leh dawhtheihna nen thahnemngai taka rawngbawl chhunzawm zel turin duhsakna a hlan a. Home malsawmtu Most Rev. Stephen Rotluanga, Bishop of Aizawl chuan chanchintha puandarh rawngbawlna mai bakah mirethei leh chanhaite dawmkan chu Kohhran mawhphurhna anih thu a sawi bawk.
Bethany Solace Home (Swadhar Greh)-ah hian hmeichhia kum 18 chin chunglam, dinhmun harsat vanga belh tur neilo te, khawtlang leh chhungkaw dinhmun phet laklawh tawh te, khuarel chhiatna avanga chennaa In nei lo te, Jail tang chhuak chhungte belh tur neilo te, Domestic Violence tuar te, pasalin an mak pan tur neilo te leh HIV Positive, mite'n an thinhrik leh chenna tur mumal neilote tan awm theih a ni dawn a. He Home-ah hian kum 3 thleng an awm thei ang a, hmeichhia kum 55 aia upate chu kum 5 thleng an awm thei dawn a, kum 5 hnuah Old Age Home lamah sawn theih an ni ang. He Home-ah hian ei leh in, thawmhnaw leh Medical facilities an dawng ang a, Counselling bakah Legal Aid and Guidance tha tak pek an ni dawn bawk a ni.
Nimin a Bethany Solace Home (Swadhar Greh) hawnna ah hian NACO leh Social Welfare Department aiawhte pawhin thu an sawi a ni.

Comments

Chhiar Hlawhte