Lawngtlai-ah One Stop Centre hawn a ni

Lawngtlai Bawrhsap, Pi Shashanka Ala-i chuan Ministry of Women and Child Development hnuaia din, Lawngtlai District-a hmeichhe baihvaite tlukluh lailawkna tur 'Sakhi - One Stop Centre' chu nimin khan Lawngtlai-ah a hawng.

Lawngtlai-a One Stop Centre hawnna hunah hian Lawngtlai DC chuan OSC chu hmeichhiate himna tura hmalakna lawmawm tak nia a hriat thu sawiin, Lawngtlai District-a an chunga hleilenna thleng hmeichhiate'n an hriat zau a, tlukluh nana an hman theihna tura pu darh tur leh chutianga tanpui ngaite bengvarpui turin kalkhawmte chu a chah a. Hmeichhiate himna chu khua leh tui tin mawh-phurhna a nih thu a sawi bawk.

One Stop Centre hi hleilenna chi hrang hrang tuar hmeichhiate'n vanduaina emaw, an sutkian zawhloh harsatna an tawh emaw-a an tlukluhna leh inhumhim lailawkna tura din a ni a. Rikrum thila tanpuina pek te, an hliam enkawl sak te, dan hnuaia an dikna chanvo an hmuh theih nana tanpui te, an rilru hahdamna tura kawm te, riahna tur leh ei tur lo buatsaihsak te an ti thei a. Chu'ng kawng hrang hranga tanpui tur chuan thawktu mi 9 an awm a ni. |umkhata mi panga (5) thleng awm theihna tur niin, mi pakhat hi ni nga leh zan nga chhung an awm thei a, chumi hnua pan tur dang an hriat loh chuan hun rei zawk awm theihna Home dangah an awm zui theih dan tur ngaihtuahsak thin an ni ang.