IAS nih tum sponsor-na tur sum MLA in a hlan

Serlui bialtu MLA leh Mizoram sawrkar-a Rubber & Allied Crops Board-a Vice Chairman ni bawk, Lalrinsanga Ralte chuan nimin khan Buhchangphai khaw mi IAS nih tum, Lalduhawma chu a zirna atan a sponsor-na cheque a hlan.

Cheque hlanna puala inkhawm nimin-a a Office, Secretariat Annex Building-ah a neih ah Serlui bialtu MLA, Lalrinsanga chuan Mizoram-in All India Service-a Mizoram-in Cadre hran kan neih theihna atan Chief Minister, Zoramthanga'n hmalakna a nei mek chu lawmawm a tih thu sawiin, “Chief Minister kan neih tawh ah ani chiah hi hetiang hmalakna nei awmchhun a ni. Kan ram leh hnam hmakhua ngaia All India Service-a Mizo a tam thei ang ber an luh theihna tura kan Chief Minister-in hma a la hi a ropui ka ti takzet a ni,” a ti.

Rubber & Allied Crops Board-a Vice Chairman chuan an hmalakna te sawiin, “Tunah hian Rubber kung nuai chuang hnai theiha peih ni tawhin, a hnaina tur hmanrua hi pekchhuah turin sawrkarin a buaipui mek a, Tender pawh tihchhuah a ni tawh a ni. Hei bakah hian Kuhva, Hmunphiah leh Coffee-ah te nasa taka hmalakna kalpui mek a ni a. SEDP-ah leh Central sawrkarah Project engemaw zat siam tawh niin a hlawhtlinna hmuh thuai kan beisei a ni,” a ti bawk.

Serlui bialtu MLA in a sponsor, Lalduhawma hi kumin 2019 HSSLC result tihchhuah hnuhnung berah khan Science Stream-ah Mizoram pum pahnihna a ni a; lehkha thiam thei bik leh tumruh tak niin IAS nih tum ngar ngar a ni a. Hei hi hriain bialtu MLA, Lalrinsanga Ralte chuan IAS ni tura a inzirna atan kumtin cheng nuai khat-in a sponsor dawn a, IAS Coaching a kal hunah a tul anga tih belh zel a la tum bawk a ni.