ZPM in SSA leh RMSA Zirtirtu lak tawh 91 te Advertisement chhuah ngeia lak \hat leh an phut

ZPM General Hqrs. chuan SSA leh RMSA Zirtirtu lak tawh 91 te chu Advertisement chhuah ngeia lak \hat leh an phut thu sawiin, a rang thei ang bera Recruitment Rules pawh siam an phut thu an sawi a. Mizoram Education System ah huaisen taka inenfiahna tur leh siam\hat ngai te siam\ha ngam tura sawrkar chu an duh thu an sawi bawk.

Inrinni-a Aizawl Press Club-a thuthar thehdarhtute an kawmna hunah ZPM General Hqrs. Vigilance Department hruaitute chuan Sarva Shiksha Abhiyan (SSA) leh Rashtriya Madhyamik Shiksha Abhiyan (RMSA) Zirtirtu tur lak danah, tunlai hian MNF leh Congress Party te nasa takin an inpuhmawh mek nia sawiin, October ni 23, 2019 (Inrinni)-a MPCC Media Cell in Congress Bhawan-a thuthar thehdarhtute an kawmnaah, RTI hmang-a an zawhna chhanna an tarlan danin, December 2018 a\anga September 2019 inkar chhungin, SSA leh RMSA a Zirtirtu lak 123 zingah, RMSA zirtirtu Advertisement chhuah thlap a lak 32 awmin, Advertisement chhuah lo in RMSA Zirtirtu 55 leh SSA Zirtirtu 36 lak an nih thu an tarlang tih an sawi a. Hetiang deuh bawk hian Congress Sawrkar lai, April - October 2015 chhungin Advertisement chhuahlo leh Qualify lo SSA Zirtirtu 58 zet a lo la tawh bawk nia sawiin, Congress Sawrkar lai tho, kum 2011 leh 2015 inkar chhung khan Advertisment chhuah lovin RMSA Zirtirtu 94 zet lak an lo ni tawh bawk tih an sawi.

ZPM General Hqrs. Vigilance Department hruaitute chuan kan Sawrkar kal tawh te’n an tihdikloh siam \hat tumna awm lova, an tihsualna ngai bawk a tihsual ve zel tumna neia Mizo mipuite chunga ngaihdam dil lova insawithiam tumna, Kan ram in kan chhiatpui em em Polilitics Kalphung diklo chhawm nun zel tumna chu an dem takzet tih an sawi a. Advertisment chhuah thlap RMSA Zirtirtu 32 lak an nih lai a, Advertisment chhuah lo leh tu tu te emaw Recomend leh rinhlelhawm tak leh diklo taka SSA leh RMSA Zirtirtu lak tawh 91 te chu Advertisement chhuah ngeiin Mizoram Sawrkar in la \ha lehin, thianghlim takin, duhsak bik awm lovin a tling ngeite lak ni se an duh thu an sawi a. A rang thei ang bera Recruitment Rules pawh siam turin Zoramthanga kaihhruai MNF Ministry chu an ngenin an phut tih an sawi bawk.

Hei bakah hian ZPM General Hqrs. Vigilance Department hruaitute chuan kan Education system mai bakah, thawktute kan kalpui danah hian Education Department leh Zirlaite tan pawh pawi thei thil tam tak, Political Party tana sawi hrehawm a awm nual nia sawiin, Sawrkar hian huaisen taka inenfiahna tur leh siam\hat ngai ah te insiam\ha ngam tura an duh thu an sawi a. Mizo mipuite chu fahrawn ang ni lova fa tak kan nihna ang ngeia min enkawl ve ngam tawh tura an phut thu pawh an sawi bawk.