Thla 6 chhungin Zoramthanga kaihhruai sawrkar ringtu an tlahniam nasa hle - Zodintluanga

MPCC Treasurer leh Assembly-a Congress Legislature Party hruaitu, Zodintluanga chuan MNF in sawrkar an siam hnu thla ruk chhung chauhin Zoramthanga kaihhruai MNF sawrkar mipui ringtu an tlahniam nasa hle tih sawiin, “Pu Zoramthanga hian Pu Lal Thanhawla a rawn chawimawi chho zel a ni,” a ti.

Aizawl North-II Block Congress Committee in nimin a Ramhlun North Community Hall-a khawmpui an neih a hmanpuina ah he thu hi sawiin Congress Legislature Party (CLP) Leader, Zodintluanga chuan, “MLA inthlan hnuhnung berah khan zaa 63 laiin MNF hi an duh lo a, 37% zingah pawh hian MNF sawrkar ringtu an tlahniam nasa em em a ni. Inthlan hmaa cheng nuai 3 kan sem dawn a tih chu an sawrkar hnuah Assembly House-ah cheng nuai 3 an sem loh tur thu sawiin 'Project base-in kan kal ang' a ti ta daih a nih kha,” tiin hengte hian mipui rinna nasa takin a titlahniam niin a sawi.
MPCC Treasurer, Zodintluanga chuan Mizoram Chief Minister, Zoramthanga chu a mangang em em nia sawiin, mak a tih thu a sawi a. “Hetiang em em a Chief Minister a mangang hi a mak a ni, Delhi kar hnih a zuk cham a, a rawn haw hnuah sawi tur a nei lo. A Minister te an zuk kal ve huna Project an siamna atan a zuk vaw dup tihte a sawi mai mai a ni,” a ti a. Chief Minister Zoramthanga chu BJP President-in a koh tawh chuan Chawlhni pawh a zah zo tawh lo nia sawiin, “Chawlhni kalta khan NEC Meeting, Amit Shah hovin Guwahati-ah neih a ni a, Chawlhni pawh sawi lovin Meeting-ah hian Pu Zoramthanga hi a kal lawp lawp a. A tuk Thawh\anni-ah BJP kaihhruai NEDA Meeting-ah tel lehin thu a sawi leh a ni,” a ti a. Chief Minister hlui Lal Thanhawla chu Chawlhni-a Meeting kohnaah a tel ngai lo nia sawiin, “NEC te aia lian daih India ram pum huap NITIA AYOG Meeting pawh Chawlhni anih chuan Pu Lal Thanhawla kha a tel duh ngai lo a ni,” a ti a. “Pu Zoramthanga hian Pu Lal Thanhawla a rawn chawimawi chho zel a ni,” tiin, “Hmasawnna thil reng reng ni se Pu Zoramthanga hian Pu Lal Thanhawla a phak ngai dawn tawh lo a, Pu Zoramthanga kalphung leh mipui hmuh dan hian Pu Lal Thanhawla a rawn chawimawi thar zel a ni,” a ti bawk.
Mizoram-a Congress a sawrkar lai khan sawrkar laipui-ah Modi-a kaihhruai sawrkar an hrawn ve tho tih sawiin Zodintluanga chuan, “Modi kha kum 5 kan hrawn ve tho a, mipuiin kan hlauh thu hria an awm lo. Award chi hrang hrang kan la zawk a, Hmarchhak-a NEC ti \ha ber, India rama Health Index \ha ber, Urban Development hnuaiah Award pali panga bakah Horticulture hnuaiah te Award kan la bawk. BJP sawrkar hnuaiah tho Referral Hospital kan siam\ha a, kan kawtkaiah Doctor zirna kan siam thei,” tiin sawrkar laipui-ah BJP sawrkar mahse State Congress sawrkar khan hmasawnna infrastructure thlengin nasa takin a kalpui tih a sawi a. Hetihlai hian tun MNF sawrkar hian eng-vanga BJP hi hlau ta em em nge an nih tih chu zawhna lian tak a nih thu a sawi bawk.
MPCC Treasurer chuan Mizoram State-a BJP MLA pakhat awmchhun chuan kan Chief Minister chu fiamthu thawh nan a hmang ta mai mai nia sawiin, “MNF hian BJP hlauh rukna riau an nei tih a chian tawh thu a sawi a, “Chutiang chu kan hrawn MNF sawrkar chu a ni. Kan hun laiin an leiba nasa tak rulh nan kum hnih chuang kan inhrek a, India rama state sum dinhmun \ha berah kan insiam thei,” a ti bawk.
Congress Party chu an tho mek nia sawi bawkin Zodintluanga chuan, Block inthlanna an neihna reng rengah Voters an tam thei hle niin a sawi a. Congress Bhavan pawh a lun thar nia sawiin, “Kan party a rawn tho leh mek a, inthlan lehah chuan kan kir leh thei ngei dawn a ni,” tiin Party Member te a fuih bawk.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia