Party dang an thawhpui avangin ZPM President in Zoram mipuite hnenah ngaihdam a dil

ZPM President, Lalliansawta chuan Member of Parliament (Lok Sabha) inthlana party dang an thawhpui avanga ZPM chhungkua leh anmahni duhsaktu Zoram mipuite hnenah ngaihdam dilin, an tihsual nawn tawh loh tur thu a sawi a. “Kan lamah Lalpa a \an ngei theih nan ama lamah kan \ang tur a ni,” a ti bawk.

Nimin a Aizawl-a ZPM Chhung Inkhawm ah an President, Lalliansawta hian thu sawiin Mizoram-ah rorelna dik, Kalphung thar – Mipui sawrkar din duh tam tak an awm thu leh, an tui pawh a hal hle tih sawiin, “Mipuite duhsakna leh khawngaihna avangin MLA bial 8 laiah chakna kan chang a, a hnu reiloteah MP (LS) inthlanah min duhsaktute rilru tina zawngin thawhpui kan nei a, kan tihsual ah pawi kan tiin kan rilru tihnatte hnenah thinlung takin ngaihdam kan dil a. Kan hmaa inthlan lo awm leh turah tihsual nawn kan tum tawh lo a, Zoram siam \ha turin tih takzetin thawhpuiah ka sawm che u a ni,” a ti.

Mizoram leilung \hatna leh hauhsakna chu taima tan chuan dinchhuahpui tham a nih thu pawh sawiin ZPM President chuan, “Kan politics kalphung diklo avang leh induhsakna hleihluak avangin kuthnathawktute an rum mek a, anni chhanchhuak tur hian ZPM chuan kan policy hi nghet takin kan keng zel dawn a ni,” a ti a. “Leilung leh a chhunga awm zawng zawngte hi Lalpa ta a ni a, Lalpa ta chu Lalpa mite enkawl tur a ni a, enkawl tlak ni turin ZPM chu chhung lamah kan inthen thianghlim a ngai a, kan lamah Lalpa a \an ngei theih nan ama lamah kan \ang tur a ni,” a ti bawk.

Sum leh pai ngah chu dinchhuahna a nih ngawt loh thu sawiin ZPM President chuan, “1972 UT hunlai a\angin kan ramah pawisa tam tak a rawn lut a, hnam angin kan dinchhuahpuiin kan zahawmpui lem lo. Kan rama corruption a hluar dan en hian Mizote hi hnam rinawm kan niin a lang lo a, a zahthlak hle. Politics hi Pathian rawng-bawlna hmun thianghlim leh pawimawh em em a ni a, kan chunga Lalpa a lawm chuan he hmun a\ang hian ram nuam, awhawm leh thianghlim kan siam thei dawn a, Zoram mipui ten ngaihtuahna thar hmang \heuh ang u,” a ti bawk.