Ramri chungchangah hmanhmawh chuk chuk theih a ni lo - Home Minister

Home Minister, Lalchamliana chuan ramri chungchangah State dang nena inbiakrawn ngai a nih thu sawiin, hmanhmawh chuk chuk theih a ni lo tih a sawi a, “A theih anga chak, nghet leh tloin ke kan pen ang,” a ti.

MNF in nimin-a Aizawl Mizo Hnam Run-a Chhung Inkhawm an neih ah Home Minister, Lalchamliana hian ramri chungchang hi sawiin, “Ramri chungchang hi a peih peihin an sawi a, inkhap theih lah a ni hek lo. Sawrkar pawhin Core Committee siamin a ngaihven reng a, a zirchiang turah pawh Forest Department leh MZP-te pawh an tel. Report lo chhuak mahse, party pakhat thil emaw, pawl pakhat thil mai a ni lo a, State dang nena inbiakrawn ngai a ni a, hmanhmawh chuk chuk theih lah a ni lo. A theih anga chak, nghet leh tloin ke kan pen ang,” a ti.

Home Minister chuan Assam in hun rei tak a\anga an lo beih tawh NRC-ah mi nuai 19 lai register theih loh an hmu tih pawh sawiin, heng mite Mizoram-a an rawn luh loh nan an ngaihven thu leh thawnhaw pawh an neih nual thu sawiin, “Rengtekawn, Kolasib-ah te, Bukpui to Serkhan-ah te Mobile checking kan neihtir a, kan hlauhthawn ang em em in an lo lang tam lo a, za tel erawh kan thawn haw. 'The Mizoram Maintainace of Household Register Bill 2019' kan siam chu vanduaithlak takin Governor-in India President hnenah ngaihtuah turin a thawn a. Engtikah nge he Bill hi kan hman theih hun tur kan hre lo nachungin, sawrkar chuan chak takin hma a la zel ang,” a ti a. ILP chu Dan hnuai a\anga pek chhuah \hin a ni tih sawiin, “A sponsor-tu Mizote ngei pawhin kan sponsor-te kan ngaihtuahzui ngai lo a, hna dang thawkin an vak kual mai mai \hin niawm tak a ni. VC leh LC-te pawhin an lo recommend hma mah mah a ni mai thei a, kan vaia kan mawhphurhna a ni tih hriain \an i la tlang ang u,” a ti a. Checkgate-ah ILP hi computerise vek an tum thu pawh sawiin, “Mobile a\angin a sponsor-tu address hriat theih vek a, thil buai awm thei hriat zung zung turin, dan mumal leh \ha zawk kan siam mek,” a ti bawk.

Zokhawthar, Champhai velah sumdawngten harsatna an tawk tih an hriat thu pawh sawiin Home Minister chuan, “Assam Riffles-ten Burma lama lei tih\hatna (fertilizer) lut tur dangin, a lo chhuk tur kuhva ro an dang a. Boundary hi Ministry of Home Affairs hnuaia awm a ni a, hman ni thil thleng pawh ka zawt a, ‘Central a\anga specific order hmu kan ni’ an ti. Tukin lamah bungrua an dang leh tih min hrilh a, eng angin nge a kalpui dan a la hriat mai loh a, kan thlir reng a ni. Tuten emaw Police Platoon hnih an tirlut tiin min dem a, Assam Riffles-ten khatia hma an lak takah chuan, kan intelligence-te a\angin buaina chhuak palh thei veng turin kan indah chho zawk a ni. Integrated Check Post fumfe taka hawn a nih hunah dan angin, felfai takin kan kal thei tawh ang,” a ti bawk.