MZP in thinurthlak an tih thu an sawi

Mizo Zirlai Pawl (MZP) chuan September 10, 2019-a Bharat Hitaraksha Abhyian(BHA) inti ten Mizoram Chief Minister hnena Memorundum an thehlut chu an duhloh thu leh thinurthlak an tih thu sawiin, “Mizo mipuite zahlohnaah kan ngai a, na takin kan dodal tlat dawn a ni,” an ti.

Hemi chungchanga nimin a thuchhuah an siamah MZP General Hqrs. chuan anmahni duhthu ngeia Mizoram chhuahsan a, vawi tam tak lo haw tura hmalak a nih hnua lo haw duh lo Tripura-a awm Tuikukte chungchanga state pathum - Madhya Pradesh, Delhi, Gujarat leh Maharastra State a\anga mi 11 in tunhnaia hma an lakna hi an duhloh thu hi an tarlang a. Heng mite Mizoram-a an rawn kir nan hian Mizoram Sawrkar leh tlawmngai pawl hrang hrangte chuan vawi tam tak hma an lo tawh tih sawiin, “Tunah hian Mizoram Sawrkar pawhin hruai kir tuma hma a lak leh mek lai a, Madhya Pradesh, Delhi, Gujarat leh Maharastra State ten Chief Minister, Pu Zoramthanga hnenah Tuikuk te hi Mizoram-a an lo haw huna a huhoa awm tur leh Tuikukte chhawmdawlna chi hrang hrang an ngensak a. State dang MP ten Tuikuk te ham\hatna tura an rawn beihpui ringawt hi MZP chuan engtikawng zawng mahin kan pawm lo,” tiin heng mite hian an kuang lo an nawr thu leh an tihloh tawp tur an ti ah an ngaih thu an sawi a, Tuikuk te hruai kir chungchangah hian lo inrawlh tawh lo turin an hriattir nghal bawk.

MZP thuchhuah chuan Bharat Hitaraksha Abhyian (BHA) mi engemawzat in Chief Minister , Zoramthanga hnena Memorundum rawn thehlut a, Tuikukte ham\hatna tur an rawn nawrpui chu an duhlo hle tih tarlangin, mi engemaw zatin Sit-in-Demonstation an nei leh CM Office an pan theih lai a, Mizo mipuiin an hre mang miah lo chu mak an ti hle tih an tarlang a. “Khati zatin Chief Minister tual-a lungawilohna an lantir thut thei kha Chief Minister Office security tan a him em tih pawh MZP chuan sawrkar kan zawt nghal a. Khati zat State pawn a\anga hnamdang lo lutte khan ILP an nei em tihte pawh sawifiah turin Mizoram Sawrkar kan ngen nghal bawk a ni,” an ti a. Tripura-a awm Tuikuk te, Mizoram a an lo haw chungchangah hian MZP chu a dinna ngai rengah an din thu pawh tarlangin, Tuikuk hruai kirna tura Mizoram Sawrkarin ruahmanna a siamte leh a hmalak mek dan chu an thlawpin \ha an ti takzet tih an tarlang bawk.