Latest News

Mizoram State Anti-Tobacco Day vawi 6-na Serchhip-ah Bawrhsap hovin hman a ni

Vaihlo in Mizote min run nasa zia leh min tihchhiat nasat zia hriaa mipui ten zuk leh hmuam dona lama hma kan sawn zual zel theihna atana sawrkar in a ruahman, Mizoram State Anti-Tobacco Day vawi 6-na chu nimin khan Mizoram pumah hman niin Serchhip-ah pawh he Ni pual hian zuk leh hmuam \hatloh zia inzirtirna neia hun hman a ni.

Serchhip CMO Conference Hall-a Mizoram State Anti-Tobacco Day puala inkhawm buatsaih hi Serchhip CMO, Dr. Laldawngliana Sailo chuan kaihruaiin khuallian nia he hun hmanpuitu Serchhip District Bawrhsap, Sangchhin Chinzah chuan Mizoram-ah puitling zingah zuk leh hmuam ti tam tak an awm thu sawiin, amaherawh chu zuk leh hmuam te chu sim theihloh a nih loh thu a sawi a. Mizo pi leh pu te chu meizu-a tuibur zu \hin nia sawi ni mah se meizuk chu naupang tih turah an ngai ngailo tih sawiin, hei bakah hian Vaihhlo leh a kaihhnawih \hatloh zia zirtirna dawng ngailo an nih thu a sawi a. Tunlaia naupangte chu zuk leh hmuam \hatloh zia zirtir leh kan taksa tana a \hatloh zia hre vek tawh an nih thu sawiin, hetiang a ni chunga tihluih \alh chu a pawi \hin thu a sawi a. Kuhva, Sahdah, Zu leh Drug te chu kan taksa tana \halo vek, a ngawl vei theih a nih thu pawh sawiin, sual-ah lian leh lian lo a awmloh thu leh sual te deuh nia kan sawi tih chhin chu sual lian zawk tih \anna a nih \hin thu a sawi bawk.
Nimin-a he hun hmanah hian K. Hming-thansangi, District Consultant, NTCP chuan an hmalakna te tarlangin Vaihlo leh a kaihhnawih khapna Dan, COTPA kenkawh kawngah leh Vaihlo ti \hin ten an sim theih nan hma an lak thu a sawi a. Sawrkar kum liamta (2018-2019) chhung khan School-ah vaihlo \hatloh zia inzirtirna \um 70 nei tura Target-ah \um 77 buatsaihin Kohhran |halai-ah \um 29 leh NGO-ah \um 9 an buat-saih thu a sawi a. Tun sawrkar kum kalmek (April - August, 2019)-ah School-ah \um 48 Awareness neiin Kohhran |halai-ah \um 4 leh NGO-ah \um 3 an buatsaih tawh thu a sawi. 
Sawrkar kum liamta chhung khan Anti-Tobacco Squad ten Squad Drive \um 77 neiin dan bawhchhia mi 110 an man thu leh heng mite pawisa chawi tlingkhawm chu Rs. 6450/- a nih thu pawh sawiin, tun sawrkar kum ah Squad Drive \um 23 nei tawhin Dan bawhchhia mi 89 manin an pawisa chawi tlingkhawm chu Rs. 4570/- a nih thu a sawi bawk a. Heng bakah hian Food and Drug Administration te nen Gutkha a\anga thilsiam, dan bawhchhia a zawrh dapchhuah hna an thawh \hin bakah Legal Metrology Enforcement Staff te nen Dan lova sikret lakluh te dapchhuah hna an thawh \hin thu a sawi bawk.
Hei bakah hian NTCP hnuaiah hian Tobacco Cessation Clinic (TCC) chu Serchhip District-ah pawh kalpui mek zel a nih thu pawh NTCP District Consultant chuan sawiin, nikum August thla a\anga kumin July thla tawp thlengin Serchhip TCC hi mi 400 in panin mi 339 ten enkawlna an lak mek thu leh TCC pantu zinga 20.05% chuan vaihlo leh a kaihhnawih an nghei thu a sawi a. An hmalakna chu hlawhtling ve hle ah an in ngaih thu a sawi bawk.
Serchhip-a Mizoram State Anti-Tobacco Day hmanna ah hian khuallian hian Ser-chhip-a Tobacco Free School 4- Govt. Model M/S, Chawngbuangi Memorial School, Govt. JM H/S leh Govt. New Serchhip P/S te hnenah Certificate a hlan a. He hunah hian National Tobacco Control Programme-a District Nodal Officer chuan he Ni thupui, ‘Vaihlo leh Chuap hriselna’ tih thupui hmangin he huna kalkhawmte hi zir-tirna a pe bawk a ni.

Comments

Popular News (Last 30 Days)