Hindi Teacher te hlawh tur pe turin ngen leh

School Education Minister, Lalchhandama Ralte chuan Mizoram a Elementary School-a Hindi zirna tharthawh leh nan Hindi Teacher 1305 te hlawh pe turin sawrkar laipui \anpuina a ngen a, heng mite hlawh pek an nih chuan Mizoram-ah Hindi zirna thar thawh leh theih a ni dawn niin a sawi.

Inrinni khan New Delhi-a Vighyan Bhawan-ah Central Advisory Board of Education (CABE) Meeting-ah Education Minister chuan he thu hi a sawi a, hei bakah hian National Education Policy 2019-ah India Hnam Pa-in a lo mitthla ang thil pawimawh leh a tum zawng zawngte chu India ram zirna kalphung laipui a ni tur a ni, a ti a, India Danpui Eight Schedule-a \awng 22 pawm tawh bakah hmun hrang hrang, a bikin India hmarchhak-ah \awng hlawm lian tak tak a awm laia rampumah \awng pakhat hman a, hnam tlem zawkte \awng luahlan tir zawnga hmalak chu engti kawng pawha pumpelh a \ul thu a sawi bawk.

Education Minister chuan Teachers Quarters chungchang pawh sawiin, thingtlang kilkhawra Elementary leh Secondary School-ah te zirtirtute chenna tur Quarters awm \halo chu hmanhmawh taka ngaihtuah ngai a ni, a ti a, Ministry of Human Resources Development-in RMSA scheme kaltlanga Teachers Quarters sakna tur a pek avangin quarters 282 sak zawh tawh a ni chu lawmthu a sawi a. Hemi bakah NEDP hnuaiah Quarters 30 sak a ni tih a sawi a, zirtirtu, an thawhna hmuna chenna In luah tur neih loh vanga an awm \ha theilo leh aikal lakte chu zirna in a tuar hle tih sawiin, Mizoram chhunga thingtlang khua sawrkar School awmna ah sikul pakhat zel tan a tlem berah Teachers Quarters Unit hnih (2) tal pe turin sawrkar laipui chu a ngen bawk.

CABE Meeting hi Union Minister of Human Resources Development, Ramesh Pokhriyal a'n a hova, India rama state hrang hrang Education Minister 19 te an tel a ni.