Chief Minister hovin Mizoram Kailawn - Business Plan Contest & Entrepreneurship Summit neih a ni

Mizoram pum huap Entrepreneur te leh Entrepreneurship-a tui te tan leh he hmalakna kaihhnawiha sawrkar department thawktute leh mithiamte intawhkhawmna hunpui, Mizoram Kailawn - Business Plan Contest & Entrepreneurship Summit 2019 chu nimin khan Chief Minister, Zoramthanga hovin Aizawl Vanapa Hall-ah neih a ni.

Mizoram Kailawn - Business Plan Contest & Entrepreneurship Summit 2019-ah hian Chawhma lamah Startup Conclave Summit neih niin, Chief Minister Zoramthanga hovin chawhnu lamah Plenary Session neih a ni a. He hunah hian Chief Minister, Zoramthanga chuan Mizo \halaite zingah Entrepreneurship lama tuina nei, hlawhtling tura tih tak meuha bei an awm chu lawmawm a tih thu a sawi a. Zoram in hma a sawn zelna turah chuan Entrepreneurship - hna thawh tur zawngtu ni lova a ruaitu zawk nih chu bung thar kan kai theihna tur a nih thu leh chumi avang chuan Entrepreneurship chawikan chu sawrkar in a ngaihpawimawh thu a sawi. Chief Minister chuan 'Kailawn' tih thumal chuan hmasawn belh zel a tinzawn angin, Mizoram in theihna \hahnem tak a neih hmang \angkaia intodelhna leh sum lakluh tipung tura beih chu kan tum tur a ni, a ti a. Entrepreneur kalkhawmte chu an hmabakah \hahnemngai taka thawk zui zel tura chahin, Mizoram chu ram hausa leh vannei tak a nihna te hrechhuak tharin, opportunity kan neihte hi ngaihtuahna seng a hma kan lak \hata kan thawh\hat chuan a takin kan ram potential te hi kan phawkchhuak thei dawn a ni, a ti.
He hunah hian Chief Secretary, Lalnunmawia Chuaungo chuan hmasawnna atan state sawrkar mai nilo sawrkar laipui pawhin Entrepreneurship chu a ngaihpawimawh thu a sawi a. NITI Aayog chuan hmeichhiate zinga Entrepreneurship tihhmasawn chu a ngaihpawimawh lehzual thu tarlangin, kumin Mizoram Kailawn intihsiaknaa Finalist 40 zinga 16 hmeichhia an ni chu lawmawm a tih thu a sawi a, NITI Aayog zirchianna a chhuah hunah pawh Mizoram chuan dinhmun sang tak a chan ngei a rin thu a sawi bawk.
He Summit-a Start Up Conclave-ah hian IIMCIP a\anga mithiamte hnen a\angin zirtirna leh thusawi ngaihthlak niin, Business Plan intihsiaknaa tel te hnen a\angin thusawi ngaih-thlak a ni bawk a. Business plan intihsiakna a tel ten Stall hawng bawkin, chawhnu Plenary Session-ah hian lawmman sem a ni. Business Plan Competition neih ah hian mi 456 inziak lutin finalists mi 40 thlanchhuah te chu Boot camp neihpui an ni a. Top 20 finalists thlanchhuah leh niin, chung a\ang chuan lawmman dawng tu mi 5 te hnenah nimin khan lawmman hlan niin pakhatna chu Francis Lalmalsawma Sailo, Zo Mushroom niin cheng nuai 4 hlan a ni a, pahniha Peter Vanlalhriata, Know Waste chu cheng nuai 3 leh pathumna Dr. Vanramhlimpuii, Zonu Meat Processing chu cheng nuai 2 hlan an ni a. Promising Ideas Award chu Lalruatfela (Doorbell) leh Lalrinpuii Hmar (Blue Montis) te hnenah hlan a ni bawk.
Mizoram Kailawn hi Mizoram sawrkar in Planning and Programme Implementation Department kaltlanga Mizo mipui, a bik takin \halaite zinga Entrepreneurship chawikanna tura buatsaih niin, sawrkar hmalakna MEDMOC (Mizoram Entrepreneurship Development & Monitoring Committee) leh IIM Calcutta: Innovation Park leh tualchhunga an thawhpui Mizoram Consultancy Group (MzGC) te \angkawpa kum 2017 atang khan kumtin buatsaih \hin a ni.
Nimin a he hun hman ah hian Planning Secretary Dr. C. Vanlalramsanga leh Dr. Subhrangshu Sanyal te chuan he summit in a rahchhuah \hen-khat puang in, Business Competition a tel zinga mi pali chuan state pawn a\anga firm lo kalte nen thawhhona thuthlung ziakin, MoU pali a rahchhuah thu an sawi a. Hei bakah hian he hma-lakna hian Angel Investor Firm din tum anih thu te pawh tarlan a ni bawk.

Comments

Popular posts from this blog

PAN CARD an tih teh fo hi - Laldinpuia