Agriculture Minister in Hrangturzo bial tlawhin khaw hrang hrang a tlawh chhunzawm

Agriculture Minister, C. Lalrinsanga chuan nimin khan Hrangturzo bial-a Bawktlang, Mualcheng leh East Lungdar khua te tlawhin Biate khaw kiang, Tuipui leilet-a Lo zawhna hun chu a hmanpui bawk.

Hrangturzo bial tlawha zin Agriculture Minister hian nimin khan Bawktlang, Mual-cheng leh E. Lungdar te tlawhin khawtlang hruaitute nena inkawmna an nei a. Loneituten an mamawh hrang hrang an lo thlen te ngaihthlak sakin heng an dilna te hi a \ul ang zela a ngaihtuahpui tur thu a hrilh a. Hemi hnu hian Biate pan lehin Zialung Community Hall-ah Biate mipuiten ropui takin an lo hmuak a. An khawtlang mamawh hrang hrangte Minister hnenah hian an lo thlen bawk.

Biate-a vantlang inkhawmah hian thu sawiin Agriculture Minister, C. Lalrinsanga chuan Biate chu Zoram pum tana khaw entawn tlak, faina leh thianghlimna lama midangte zirtirtu an nih thu sawiin, “In thinlung thianghlimna leh faina hi in tual-ah a rawn lang chhuak a, khaw ngaihsan awm tak in ni,” a ti a. Helai tlang dung khuate chu Serthlum ching nasa khua an nih thu pawh sawiin, Serthlum chingtuten kum rei zawk Serthlum an thar theih nan Drip Irrigation kalpui tum niin Project lian tham tak siam a nih thu a sawi a. Irrigation hmalakna leh Land Development lam te pawh nasa taka kalpui an tum thu sawiin, “Ei leh bara intodelh hi kan sawrkar thiltum lian ber a nih avangin kuthnathawktute tan ruahmanna tam tak a awm dawn a ni,” a ti bawk.

Agriculture Minister chuan, kan ram thlai chin, keimahni ta ngei Mizo Hmarchate leh thlai dangte Geographycal Identification (GI) neih tuma hmalak mek a nih thu pawh sawiin, Mizoram in Water Policy \ha tak a neih theih nana hmalak mek a nih thu te, kan rama thlai natna lo chhuak \hin te Chemical hmanga bei let lova Biological Control hmanga kan beih let theih nana Laboratory ngaihtuah mek a nih thu te a sawi a. Crop Insurance Scheme fel tak kan neih thu te, Farmer Pension Scheme thar nei thuai tura hmalak mek a nih thu te leh phailama mithiamte nena an inbiakna a\angin kan Aieng leh Sawhthingte hralhna \ha tak a awm thei dawn ni a a hriat thute a sawi a. Biate chu Khawzawl District thara lut tur an nih avangin Civil SDO an lo dil chu dil awm tak nia a hriatpui thu pawh sawiin, sawrkarin a \ul anga ruahmanna \ha tak a rawn duan chhuah thuai a beisei thu a sawi bawk.

Zialung Community Hall a hun a hman zawh hian Agriculture Minister hianTuipui lui phai pan lehin helai vela leilet neitu leh khawtlang hruaitute nen leilet thlawh zawh (lo zawh) na an nei leh a. Biate khaw tana tuilakna tur thawh mek a tlawh nghal bawk.