ZPM in thudik puang turin sawrkar an phut

ZPM chuan Mizoram sawrkar Flagship programme, Rua/Mau chungchangah mipui nawlpui tana thudik hriat har khawpa thu inchuh a awm \hin chu pawi an tih thu sawiin, Thudik hriat chu mipui chanvo anih angin, Mizoram sawrkar chu thudik puang chhuak tura an phut thu an sawi.

Nimin a thuchhuah an siamah ZPM chuan Assembly Budget Session hnuhnung ber, June 12-27, 2019 chhunga neih ah khan Mizoram Chief Minister chuan Mau/Rua chi \ha, Brandissi chu lo thleng mai tur anih thu leh, thlatin nuaih khat tal lo thawn an tum thu Assembly House zahawm tak a lo hrilh tawh tih an tarlang a. Hei bakah hian Mizoram in July 11, 2019-a New Delhi a Agriculture Today buatsaih, Agriculture Leadership Conclave-ah Best Horticulture State Award a dawn lawmna July 15, 2019-a Chief Minister, Zoramthanga hova Horticulture Directorate Conference Hall-a neih ah Chief Minister chuan Rua/Mau chi \ha engemawzat chu Mizoram a lo thlen tawh thu leh 3000 (sangthum) vel chu hardening ti tura a \iak phun anih thu a lo sawi tawh bawk tih an tarlang a.

Hetihlai hian July ni 29, 2019 thleng khan a changtu Horticulture Department-in RTI Act hmanga zawhna an chhanna ah, Rua/Mau chi Mizoram-a thleng a la awm loh thu te, supply tura inremna (agreement) siam pui an la awm loh thu leh hmun dang a\anga Rua/Mau chi \ha supply-tu tur thlan a la nih loh thu te tarlan a ni thung si tih tarlangin, “Mizoram sawrkar Flagship programme hi dik tak leh langtlang taka kalpui a nih hi ZPM party chuan a beisei tlat a. Thudik hriat hi ram mipuite chanvo anih ang ngeia hmala turin Mizoram sawrkar kan phut bawk a ni,” an ti.