Zoram Nationalist Party (ZNP) \hiatin a bo a bang awm lovin ZPM-ah an inchhunglut

ZNP President, Lalduhoma chuan nimin khan Zoram Nationalist Party (ZNP) chu \hiatin, a bo a bang awm lovin lungrual takin, Zoram People’s Movement Party (ZPM)-ah an inchhung lut ta tih a sawi a. ZPM hruaitu thar te chu theihtawpa \awiawm a pawimawh thu a sawi bawk.

Nimin-a Aizawl-a ZPM chhung Inkhawm-a thu a sawina ah ZNP President leh ZPM-a hruaitu, Lalduhoma chuan kum 1986 khan kan ramah Remna leh Muanna a thlen theih nana beihpui thlak turin, hruaitu leh member \hahnem takin Congress chhuahsanin, Mizo National Union (MNU) an din tih sawiin, “Kum 1989 khan, PC Party leh MNU-te chu in\hiatin, MNF leh Neutral a\anga lo kalte nen, Brig. T. Sailo President-na hnuaiah, Democratic Party kan din ta a. Amaherawh chu, kum khat lek hnuah a keh leh ta mai a. PC ho kha chuan Mizoram Janata Dal (MJD) an din ta a. Keni MNU-ho erawh chu 1990 khan MNF-ah kan lut ta thung a ni,” a ti a. MNF-ah hian Zoramthanga kaihhruaina hnuaiah kum 7 an awm thu leh Party inthlan-ah President atan Official Candidate-a thlan tlin a nih thu sawiin, “Diklo taka tihbuai a nih avangin, MNF Party chu Unit a\anga Hqrs. thlengin intia tawk takin a phel ta a. MNF Founder President Pu Laldenga te chhungkua te, Signatory rual leh Mizo National Army-a Senior Officer rual tam zawkten member tam takte leh MNU kal zelte khan MNF chhuahsanin, MNF(Nationalist) Party kan din ta a ni,” a ti.
ZNP President chuan MNF (N) chu December 12, 1997-ah Election Commission-in Political Party-ah pawmin a register thu sawiin, January 28, 1999-ah Regcognised Party ni zuiin, Election Symbol atan Ni (Sun) pek an nih thu te, June 29, 2000-ah Party hming chu Zoram Nationalist Party (ZNP) tia thlakin September 19, 2000-ah ECI-in a pawmpui angin ZNP tih hming chu an pu hlen ta tih a sawi a. Term hnih chhung MLA 2 ve ve an thlan tling ve tawh thu leh tunah hian Unit 730 vel leh Block 52 leh District 2, Lawngtlai leh Siaha-ah an neih thu a sawi a. Tunah chuan an Party hming te, an Flag te, an Symbol leh Party hla, an lo lampui \hin zawng zawng te kha an lo ‘Mang\ha’ dawn ta tih a sawi bawk.
MNU din a\angin kum 33, ZNP din a\angin kum 22 lai a lo nih tak thu pawh sawiin Lalduhoma chuan, “Vawi khat pawh la sawrkar lo chunga pun lam kan la pan ve reng thei hi a Policy-a kan ngheh vang a ni a. Khawsak harsat vanga Ruling-a han bazar tawk te awm \hin mahse, a hunah chuan an lo kir leh deuh vek zel a. Politics-a thutlukna siam harsa ber ber tam tak lungrual takin kan paltlang zel bawk. Hei hi a chhan chu Collective Leadership-a kan inhruai \hin vang leh, Committee thu zel a ro kan rel \hin vang a ni,” a ti bawk.
ZNP President chuan ZNP chu Congress a\ang te, MNF a\ang leh Neutral a\anga intelkhawm an ni deuh ber tih sawiin, “Kan ram hruaitu lawk Pu Hawla, Pu |hena leh Pu Rama te kaihhruaina hnuaiah te lo awma lo hrawn tawh tu te kan ni a. Kan Policy a puitlinna tura nih phawt chuan Party te hial pawh kan ram Maicham-ah lo halral ngam tawh \hin kan ni a, nihna leh dinhmunah kan buai ngai lova, mahni dinhmun kalsan zing ber kan nih \hin kha. Chutiang rilru pu chunga ZPM tichaktu leh timawitu ni zel turin ka ngen che u a ni,” a ti a.
Tunah chuan ZPM chu Party kalphung pangngai angin an kal vek thei rih lo tih pawh sawiin, kum khat chhung atan Val Upa ten hruaitu \ha tak tak an ruatsak te chu theihtawpa an \awiawm a pawimawh ber dawn tih a sawi a. “Kan hotute hi mipui thlan an nih loh avang hian mi mitmei an vengin an inthlahrung lutuk ang tih hi a hlauh-awm a, an dinhmun hi kan hriatthiampui a ngai hle ang. Bul \an fuh hi thil pawimawh tak mai a ni a. Chuvangin, ZNP mi leh sate zawng zawng chu, awmna hmun \heuhah, tunhma ang bawka huaisen, ngelnghet, taima leh hotute thuawi thei ni zui zel turin ka ngen tak meuh che u a ni,” a ti bawk.

Comments

Popular posts from this blog

PAN CARD an tih teh fo hi - Laldinpuia