Serchhip RD Block huamchhunga VC te tan Dan pawimawh hrang hrang zirhona neih a ni

State Institute of Rural Development & Panchayati Raj (SIRD&PJ) Mizoram buatsaih Serchhip RD Block huamchhung Village Council te tana Training chu nimin khan Serchhip Tarpi Tlang-a DPRC-ah neih \an a ni a, Serchhip DRDA Project Director, H. Dolianbuaia chuan he training hi a hawng a ni.

Training on Orientation/Foundation Course for Elected Representative hawnna nimin a District Panchayat Resource Centre (DPRC) Auditorium-a neih hi DPRC Serchhip-a Head Faculty, Vanlalhruaia Ralte chuan kaihruaiin Serchhip DRDA Project Director, H. Dolianbuaia chuan VC dinglai term chu nakum mai-a tawp tur niin lang mah se tuna VC tam tak chu VC member an la nih dawn tho avang leh VC ni kher lo pawhin Dan hrang hrang hriat chu thil pawimawh a nih avangin he training hi ngai pawimawh turin he huna kalkhawm VC te chu a chah a. VC ni kher lo tan pawh Dan hriat a pawimawh thu sawiin, VC te tan phei chuan Dan an hriatna chu an huaisenna tur pawimawh tak a nih thu a sawi a. Dan mai bakah kan khawsak phung-a thil hrang hrang hriatzau a pawimawh thu sawiin, Dan-a inziak piah lamah Dan bawhchhe si lova khawtlang tana \ha tur ngaihtuahna ah pawh Dan hriat phawt a pawimawh thu a sawi.

Hei bakah hian DRDA Project Director chuan khawtlang rorelna ti changtlung zela Panchayati Raj System hmang turin sawrkar pawh a inbuatsaih mek nia a lan thu sawiin, hetiang kalphung kan hman hunah phei chuan tuna kan VC te dinhmun leh an mawhpurhna a san zel dawn avang leh an thuneihna a san zel dawn avangin mipui leh khawtlang hruaitute pawh an inpuahchah ve zel a \ul thu a sawi bawk.

He training hi ni 4 chhung awh tura ruahman niin hemi hun chhung hian Village Council Act 1953 te, Mizoram Village (Sanitation) Rules-2017 te, Animal Control & Taxation Rules te, Mizoram Forest Act (Ram kang venna Dan) te, Village Council Court nihphung leh a hnathawh leh thuneihna te, Vantlang inkhawm leh Social Audit chungchang te leh VC hnathawhna kawnga thil pawimawh hrang hrangte zirho a ni dawn a, Vanlalhruaia, Head Faculty, DPRC Serchhip bakah Lalthanmawia Ralte, Principal, Extention Training Centre, Thingsulthliah leh V. Lalhmangaihi, Faculty, Extention Training Centre, Thingsulthliah ten zirtirna an pe dawn a ni.