Serchhip District H/S Sports Meet neih \an a ni

Serchhip District High School Sports Meet vawi 17-na chu nimin khan DC Playground, Khaw-tetlang-ah neih \an a ni ta, tunkar Zirtawpni thleng a awh ang.

Serchhip District High School Sports Meet hi Serchhip District Education Officer (DEO), Lawmawma chuan khuallian nia hawngin infiamna chu taksa hriselna atana thil pawimawh, insawizawina a nih thu sawiin, hei vang hian sawrkar pawhin a ngaih pawimawh thu leh zirlaite tan pawh zirna kawnga puitlinna a nih avangin a pawimawh thu a sawi a. Sports chu zirna peng pakhat a nih thu sawiin, zirlai naupangte chu infiamna leh taksa sawizawi ngai pawimawh turin a chah a. Hetiang infiamna hun an neih te hi \hian inzawnna atan hmang \angkai turin zirlaite chu a chah bawk.

Serchhip District High School Sports Meet-ah hian Serchhip District chhunga High School 21 telin Athletics-ah item chi hrang hrang bakah Boxing, Judo, Volleyball leh Football-ah inelna an nei dawn a, Hmeichhe Hockey erawh Then-zawl-ah khelh ni tawhin an zofel tawh thung a. Boxing leh Judo inelna hi Serchhip Boxing Hall-ah neiin Volleyball inelna leh Athletics hi DC Playground-ah neih a ni anga, Football inelna chu Serchhip Sports Complex-ah neih a ni bawk ang.