Serchhip-ah PRRS vei Vawk 9 tihhlum a ni: Aizawl District-a Vawk man tihhlum vek a ni bawk

Tunhnaia Serchhip District chhunga dan lova Vawk lakluh 9 te chu PRRS vei an ni tih hmuhchhuah a nih avangin tihluma phum vek an ni a. Hetihlai hian tunhnaia Aizawl District chhunga Vawk an man zinga PRRS vei te pawh Magistrate thupek angin tihhlum vek a ni bawk.

Tunhnaia Vawk hri leng laka mipuite himna tura Serchhip District Magistrate in Serchhip District pawnlam a\anga Vawk lakluh a khapna thupek bawhchhia a tun thla ni 19 zana Khawzawl District ni ta, Sialhawk khua a\anga Serchhip District-a Vawk lakluh 9 te hi Serchhip-a AH&Vety Department te chuan an thisen an enfiah hnuah Vawk natna, Porcine Reproductive and Respiratory Syndrome (PRRS) vei an ni tih finfiah a nih avangin Serchhip District Court chuan tiral tura a tih angin Inrinni khan tihhlum-a phum nghal an ni a, heng Vawk te hi Serchhip Zawlpui kawng-a Sa talhna hmun siamah tihhlum niin a bulah phum nghal vek an ni a. Tarlan tawh angin heng Vawk te hi Sialhawk khua a\ang hian 207 Truck hmanga rawn lakluh niin Mualcheng khua ah A&Vety Department-a thawk te leh khawtlang in an lo man a, Thawhlehni khan Serchhip rawn thlenpuiin Serchhip Police te lutah dah nghal a ni a. Heng Vawk te hi an thisen enfiah a nih hnuah PRRS an vei tih finfiah a nih tak avangin tihral a ni ta a ni. 
Hetihlai hian heng Vawk 9 lai rawn kengtute thubuai chu nimin khan Serchhip District Court-ah ngaihtuah niin lehkha pawimawh te enfel a ni a, thutlukna siam lovin thla thar September 3-ah he thubuai hi ngaihtuah leh tura tih a ni.
Hetihlai hian Mizoram Vawk lakluh khapna thupek bawhchhiaa July 25 leh 28, 2019-a Aizawl District chhunga Vawk an man 121 te zingah PRRS vei te pawh Magistrate thupek angin tihhlum vek an ni a. Aizawl District chhunga dan lova Vawk lakluh an man 121 zinga 23 te hi a thi sa a man niin a la dam 98 te chu Magistrate thupek angin, PRRS test an ni a, PRRS vei chu tihhluma phum nghal an ni a. Hetih hun laia PRRS la vei ve lo Vawk engemaw zat chu enkawl chhun-zawm an ni a. Magistrate thupek angin August ni 23, 2019 khan PRRS an vei leh vei loh enfiah leh a ni a, an vaiin PRRS an lo kai vek tawh a. Nimin khan PRRS hri a darh zel loh nan AH&Vety Farm, Selesih-ah tihhluma damdawi nen uluk taka phum an ni.
Porcine Reproductive and Respiratory Syndrome (PRRS) hi Mizoram-ah kum 2013-ah a leng \an a, hei hi India rama Vawk hri a len vawikhatna a ni. Kum 2016-ah leh 2018-ah te PRRS hi Mizoram-ah a leng nawn leh a, kum 2013-ah PRRS vangin Vawk 3806 an thi a, hemi kum a Vawk thi avanga sum hloh zat chu cheng nuai 317 a tling a. Kum 2016-ah Vawk 4699 thi lehin, Vawk thi vanga sum hloh cheng nuai 437 tlingin, kum 2018-ah PRRS vanga thi Vawk 2574 awm lehin, Vawk thi vanga sum hloh chu cheng nuai 308 a tling leh bawk a ni.
Kumin hian Mizoram ah PRRS hi a leng rihlo nia hriat a ni a, amaherawh chu ram pawn a\anga Vawk lalut ru hi an awm reng avangin PRRS vei Vawk erawh hmuh tur an awm ve deuh reng thung a. Hei vang hian sawrkar chuan mipui te chu khapna dan bawchhia a Vawk lalut lo turin a ngen a ni.

Comments

Chhiar Hlawhte

Youth Icon Top-50 thlang

PAN CARD an tih teh fo hi - Laldinpuia