SADS Duty Centre hawng

Serchhip Sub-Hqrs. YMA Anti-Drug Squad (SADS) Duty Centre thar, Zawlbuk tia vuah chu nizan hmasa khan Serchhip Bazar-a YMA Sub-Hqrs. Office Building-ah hawn a ni.

SADS Duty Centre thar hi Serchhip Sub-Hqrs. YMA President, R. Sanghmingthanga chuan hawngin SADS Chairman, Lalzuiliana kaihhruaiin inkhawm tawi neih zui nghal a ni a, he hunah hian Sub-Hqrs. YMA President, R. Sanghmingthanga chuan ruihhlo avanga kan manganna chu a zual zel tih sawiin, kum 2014-ah Serchhip-ah a vawi khatna atan Heroin manin tunah chuan Heroin a tam tawh hle tih a sawi a, damdawi ti ten an pan \hin OST Centre pawh nitin mi za telin an pan nia sawiin, HIV/AIDS nasa taka a hluar phah thu leh ruihhlo ti te zingah mai bakah raipuar-ah te thlengin HIV/AIDS vei hmuhchhuah an tam thu a sawi bawk.

He hunah hian Serchhip Sub-Hqrs. YMA Secretary, Lalrammawia pawhin ruihhlo dona kawngah YMA lakah mipui beiseina a sang hle tih sawiin, YMA te hian ram leh hnam hum-halhin ramngaw leh nungcha humhalh kawngah nasa takin hma la mah ila kan ram luaha kan hnam hmabak la ni tur \halaite ruihhlo in a tihchhiat vek si chuan heng kan hmalakna te hian awmzia a nei dawn chuanglo tih a sawi a. Hei vang hian ruihhlo dona kawngah nasa zawka hmalak a \ul thu leh ruihhlo dona chu tisa kawnga inchhan-damna a nih piah lamah Thlarau chhandamna a nih thu sawiin, Kohhran lam pawhin nasa taka an phurpui \hin thu leh \anpuina pawh an pek \hin thu a sawi bawk.

Serchhip SADS Duty Centre thar-ah hian a \ul huna chechhuak thei turin Duty dah a ni dawn a. Hemi hmalam hian SADS hian chak zawka hma an lak theihna turin mihring phur chi lirthei chi hrang hrang neitute chu thawhhona thuthlung an lo ziahpui tawh bawk a. Nizan hmasa a he hun hmanna ah hian hmalak zui dan tur hrang hrang an sawiho nghal bawk a ni.