PRISM in sawrkar chet dan demawm an tih thu sawi

PRISM party chuan Indian Forest Act siam\hat tumna chungchanga Mizoram sawrkar chet dan chu demawm an ti takzet tih sawiin, awmze neia hma la nghal tura an duh thu an sawi.

Inrinni-a thuchhuah an siamah PRISM Party chuan Indian Forest Act chu siam\hat tum a nih thu leh hemi atan hian Draft Bill pawh hun rei tak kalta khan siamfel a ni tih a sawi a. Mizoram sawrkar hnenah he Bill duan hi rawn thawnin rampum huapa inrawnkhawmna nei turin tih a nih thu leh inrawnkhawmna neih hun tur thla khat chuanga a pelh hnuah pawh inrawnkhawmna buatsaih a la ni lo chu demawm an tih thu an tarlang a. He Bill duan tharah hian rambuai laia sipai in an rinhlelh te an duh duha an man a, an In an dap a, an duh phei chu an kaphlum thei ang khan Forest Department chu thuneihna pek tur a ni tih pawh tarlangin, “He Dan duan thar hi tihpuitlin anih chuan mipui kan chep hle dawn a. Rambuai laia mipui min sawisakna Dan, Armed Forces Special Power Act ai khan a hlauhawm hial a. Kan sawrkar hian he mipui nekchepna tur hi a dodal ngei ngei a ngai,” an ti a. Dodalna kalpui anih hnua hmai phih nana NGO tlemte chauh hnena he Bill chungchanga ngaihdan thawh tura an ti leh mipui laka thup an la tum tlat chu a diklo hulhual niin an tarlang. Hetiang khawpa mipui nekchepna tur Dan siam tumnaa sawrkar a ngawi reng chu demawm an tih thu sawiin, Central sawrkarin ti tura thu a pek ang ngeia rampum huapa inrawnkhawmna buatsaih nghal tura sawrkar chu an duh thu an thuchhuah an chuan an tarlang bawk.