NEC Quota-a MBBS zir tur thlang fel tawh

Sawrkar puihnaa damdawi lam zirnaa Mizoram-in NEC-a Quota a neih MBBS seat 82 leh BDS Seat 7 zir turte thlan fel an ni tawh.
North Eastern Council (NEC) puihnaa damdawi lam zirnaah kumin hian Mizoram-in Bachelor of Medicine and Bachelor of Surgery (MBBS) Seat 82 leh Bachelor of Dental Surgery (BDS) Seat 7 a chang a, NEC puihnaa Mizoramin MBBS seat a chante chu Falkawn-a Zoram Medical College-ah seat 70 bakah Seat dang 13, Manipur-a Regional Institute of Medical Sciences (RIMS)-ah seat 7, Meghalaya-a NEIGRIHMS-ah seat 3 leh Tripura-a Agartala Government Medical College-ah seat 2 te niin a vaiin seat 82 a ni a. BDS chu RIMS-ah seat 4 leh Guwahati-a Regional Dental College-ah seat 3 a ni a. Heng Seat zawng zawng hi hnawhkhah tawh a ni a, Admission pawh an ti vel vek tawh a, Mizoramin BDS Seat 7 a neih zir turte pawhin Admission hi an tifel tawh a ni.
Technical Wing hotute sawi danin, nikum lamah kha chuan NEC hnuaiah hian Mizoram in MBBS seat 14 a chang tih an sawi a, kuminah Seat 12 chauh an hmuh tak chhan chu Mizoram-ah Medical College a awm tawh avanga Assam Medical College-in Seat a pek phal tawh loh vang a ni. Zawhna chhangin Technical Wing hotute chuan, Central Quota-a Mizoramin damdawi lam zirnaa Seat a hmuh tur zat chu Allotment ala chhuah loh avangin hriat theih ala nih loh thu leh tun thla chhunga hriat theih beisei a nih thu an sawi a. Mizoram-ah MBBS zirna Zoram Medical College (ZMC) a awm ve tawh avanga Central Pool-a Mizoram seat chan tur a danglam dawn leh dawn loh zawhna chu an chhan theih loh thu an sawi bawk.
Hetihlai hian Engineer zir duh Technical Wing-a in hriattir te hnenah chuan Allotment pek vek a ni tawh thung a, kumin hian Engineer zirna ah Mizoram-in Central Pool-ah Seat 121 leh NEC hnuaiah Seat 16, a vaiin seat 137 a nei a ni. Mizoram a\anga Engineer zir duh in hriattir chu 131 an ni a, an vaiin seat pek vek an ni tawh a ni. Technical Wing hotute chuan Mizorama Technical Course hrang hrang zir tur thlanna dan hman chungchang ah Supreme Court-in thutlukna siam mah se, zirlai thlan kawngah harsatna an tawh loh thu leh Mizoram Sawrkar Councils of Minister thutlukna anga zirlaite hi thlan an nih thu an sawi bawk.

Comments

Popular posts from this blog

PAN CARD an tih teh fo hi - Laldinpuia