I&PR Minister in Khawzawl-ah DC Office hawngin Sept. 12-ah District thar lawmna neih a ni dawn

Nimin khan I&PR Minister, Lalruatkima chuan Khawzawl Darngawn Veng-ah Khawzawl Deputy Commissioner (DC) Office thar a hawng a, Khawzawl Zaingen YMA Hall-ah Deputy Commissioner leh Superintendent of Police te lawmna puala inkhawm neih chu a hmanpui bawk.
Nimin a Khawzawl DC Office thar hawnna leh DC leh SP thar te lawmna puala inkhawm ah hian I&PR Minister chuan bialtu MLA leh Deputy Chief Minister ngenna anga kal a nih thu sawiin, hun rei tak chhung nghakhlel taka Khawzawl leh a chhehvel mipui ten an lo beiseiin a tak ram a lo chang ta chu a lawmawm takzet tih a sawi a. “He District hi kum 2008 khan a piang tawh a, kum 10 a function theihloh hnuah tunah a paitu ngeiin a hring ta hi a lawmawm zual bik a ni,” a ti a. “Sawrkar chuan ngun taka ngaihtuahna sengin District thara Office dah hmasak ngai, DC Office leh SP Office a\angin bul kan \an ta a ni a. Chief Minister chak tak kaihruaina hnuaiah theihtawp kan chhuah zel anga; Revenue Department, RD, I&PR leh Department suanluh hmasak ngai te pawh dah chhoh zel kan tum a ni,” a ti bawk.
He hunah hian Khawzawl District Bawrhsap thar, H. Lianzela chuan a mawhphurhna thar chu huphurhawm hle in lang mahse Khawzawl mipuite phurna nasa tak te leh tumruhna hmel te a hmuh avangin tunah chuan a phurawm tawh hle tih a sawi a. Beiseina thar leh District tana hmathlir thui tak nen a hna a zawm tih sawiin, District pian theihna atana theihtawp lo chhuahtu te zahna chibai a buk tih sawiin, Khawzawl District chhunga mipuite bakah Head of Office te chu thawhpui ah a sawm a, District changtlung zawk nih theihna atana an ruahmanna (Road Map) te a rang lama buatsaih turin a chah bawk. He hunah hian Khawzawl SP, PC. Lalchunglura pawhin Police leh mipuite thawhhona \ha a awm theih nan mipuite phungbawmna a ngen a. Khawzawl District chhunga mipuite chu dan leh hrai kaihnawih thil an kutah chinfel tum lova, thuneitute hnena hlanchhawn ngai pawimawh tlat turin a ngen bawk.
Khawzawl DC Office thar hawnna Programme hi ST. Lalvensangi, SDO (S), Khawzawl chuan kaihruaiin Khawzawl District thar lawmna hun chu kum 2008-a District atana Khawzawl puan champha September 12 khian neih tura ruahman a ni.

Comments

Popular posts from this blog

PAN CARD an tih teh fo hi - Laldinpuia