e-Visa District Facilitation Centre buatsaih tum

Law & Judicial Minister, TJ. Lalnuntluanga chuan Inrinni khan Champhai-a a chenna In-ah Champhai Bawrhsap, Dr. Naveen Aggarwal leh District thuneitu dangte kawmin e-Visa chungchang an sawiho.

He sawihona hunah hian dan ang thlapa India leh Myanmar kaltlanga inkal-pawhna awlsam leh rang taka mamawhtu ten internet kaltlanga e-visa an dil zung zung theihna tur chungchang chipchiar taka sawiho a ni a. Minister thurawn leh ngenna bawhzuiin DC Office ruahmanna a thla hnih khat chhunga e-Visa District Facilitation Centre, DC Office kaltlanga buatsaih hman tum anih thu leh hei hian Immigration Centre leh Integrated Check Post changtlung zawk siam kawngah kawngro a sut ngei beisei anih thu tarlan a ni.

Hemi hmalam Zirtawpni tlai khan Law Minister leh District Official-te hian Myanmar Immigration Office, Khawmawi Myanmar ami chu tlawhin thawktute hnathawh dan, hmalakna leh e-Visa chungchangte an zirchiang a. Mizoram lamah pawh Passport neite tan online hmanga e-Visa pek anih theih dan turte leh dan ang thlapa awlsam zawka inkalpawh leh insumdawntawnna neih anih theih dan turte an lo en ho tawh a ni.

Transport Minister ni bawk, TJ. Lalnuntluanga hian Zokhawthar leh Melbuk khuate pawh tlawhin ramri a inkalpawhna leh insumdawn tawnna hmun an enho a, Minister chuan Zofate inpumkhatna leh inpawhtawnna turin Champhai leh Tahan inkarah Bus service tuma hmalak anih thu leh inpumkhatna leh inkalpawhna vawng nung tura chak zawka hmalak a \ul thu a sawi a. Immigration and Integrated Check Post leh Land Custom Station changtlung zawk siam tura hmalak thuai anih tur thu a sawi bawk.