Article 370 leh 35A nuaibo lawmawm an tih thu sawi

BJP Mizoram Pradesh chuan sawrkar laipui in India ram danpui Article 370 leh 35A a nuaibo ta chu lawmawm an tih thu sawiin, Central sawr-kar in Article 371 hnawlin, India hmarchhak mipui te dinhmun pawh a ti derthawng dawn nia sawi chu mipui rilru hruaisual tumna niin an sawi.

BJP Mizoram Pradesh-a General Secretary, Vanlalhmuaka’n nimin-a Aizawl-a BJP Office-a thuthar thehdarhtute a kawmna ah he thu hi sawiin BJP chuan Lok Sabha inthlanpui-2019 neih zawh takah khan BJP in sawrkarna an chang leh a nih chuan Jammu and Kashmir ah remna leh muanna leh hmasawnna a taka a thlen theihna atana kawng daltu ni a lang, Article 370 leh Article 35A chu nuaibo a nih tur thu hi point 14-na ah tarlan a nih thu sawiin, sawrkarna an siam hnuah an intiamna anga hma an lak tak thu an sawi a. Hetianga ram mipuite himna tur leh hmasawnna atana mahni thutiam a rinawm leh ding nghet hruaitu India ramin kan nei chu an chhuan thu leh an hmalakna chu an thlawp thu a sawi bawk.

Hei bakah hian Vanlalhmuaka chuan Party \henkhat ten India Constitution Article 370 leh 35A nuaibo a nih tak avanga Constitution Article 371G hmanga a bika inhumhalh Mizoram State bakah India hmarchhak State \henkhatte dinhmun derthawng mai thei anga thu an thehdarh chu Article 370 leh 35A leh Article 371G chuangchang leh dinhmun an hriat chian tawk loh vangah an ngaih thu an sawi a. ‘Article 371 ti danglam turin hmalak a ni dawn lova, hmarchhak mipuite thlamuanna ka tiam a che u, India hmarchhak ram chu a him tawk a ni,’ tiin Union Home Minister, Amit Shah chuan tunhnai khan a sawi thu leh BJP hruaitute chu an thusawi leh thutiam-a ding, Manifesto ti puitling \hin an nih thu a sawi bawk.