Mizoram-a Zu khap a nih hnuah Mizoram hnaih Assam State-a Zu dawr te hawn \an a ni leh tawh

Mizoram Liquor Prohibition Act (MLPA) pass a nih hnuah Mizoram a dan anga Zu zawrh khap a nih tak avangin Mizoram chak lakna hnai ber, Inter-State ramri depa Lailapur (Assam)-ah Zu dawr te an in hawn leh \an thu Vairengte Excise Department hotute chuan an sawi.

Mizoram a dan anga Zu zawrh a nih hma khan Lailapur-ah hian Zu dawr pathum (3) awmin, heng Zu dawr a\ang hian Mizo ten Zu an lei nasa thei hle a, Vairengte Excise Department Checkgate-ah pawh dan phal loh a Mizoram lama Zu phurhluh tur \hahnem tak an mansak \hin a. Mizoram-ah Zu zawrh anih ve tak a\ang khan heng Zu dawrte hi nasa tlakin an tlachhia a, dawr \henkhat khar hman hial a ni. Amaherawh chu Mizoram-ah Zu khuahkhirhna Dan siam a nih hnu tun dinhmunah heng Zu dawr te hi hawn a ni leh tawh hlawm a, Zu dawr te hi hawn ni leh tawh mahse State pawn a\anga Zu tawlhruk liantham man a la awm loh thu Vairengte Excise Department hotute chuan an sawi a, Mizoram-ah Zu lei tur a awm loh vang erawh chuan mi \henkhat Zu lei tura Lailapur pan an awm reng thung a. Hei vang hian Checkgate ah pawh an duty ngawrh hle tih an sawi bawk.

Tarlan tawh \hin angin kum 1984 khan Mizoram-ah Zu dawr hawn \an a ni a, hemi hnu hian khap tak tak si lo, phalrai bawk si lova hun engemaw chen a kal hnu-ah kum 1995 khan Mizoram Liquor Total Prohibition (MLTP) Act chu siamin  February ni 20, 1997 a\anga hmang \anin na taka Zu khap a ni ta a. Sawrkarin a rilru thlak lehin kum 2014 khan Mizoram Liqour (Prohibition and Control) Act chu siamin January ni 15, 2015-ah hriattirna chhuahin hman \an niin March ni 16 a\anga Zu zawrhna dawr hawn \an leh a ni a. Tuna MNF sawrkar lo ding hian nikum November ni 28-a Assembly inthlan hma a an tiam angin Zu dawrte kharin Zu khapna dan hi siam lehin hei hi kumin March 20 khan Assembly House-ah pharhin pawm a nih bakah sawrkar in Gazette-ah a tichhuak tawh a, tunah hian a Dan tesep te buaipui chhoh mek a ni bawk.

Hetihlai hian tunlai hian Vairengte leh Lailapur velah Zu mai nilo, ruihhlo hmansual a hluar hle tih Vairengte Excise Department hotute chuan sawiin, tunhnai khan Vairengte Joint YMA huaihawtin ruihhlo hluar nasa lutuk tihrem dan turah khawtlang huapa hmalak dan tur inrawn-khawmna neiin, nasa takin hma an la a, Lailapur lamah pawh ruihhlo dotu pawl, Voice Against Social Evil (VASE) din niin, Lailapur leh a chhehvelah ruihhlo hmansual leh ruihhlo a sumdawng te lakah khauh zawka hma lak an tum bawk.