MPCC in Lokayukta-ah chhui turin thlen

MPCC Legal Department chuan nimin khan Mizoram Lokayukta Chairman, C. Lalruata hnena CAG Report-a Rural Development Department-a eirukna awm ngeia inziak chu chhuichhuak a, a mawhphurtute dan anga hrem turin Complaint an thehlut.

Mizoram Pradesh Congress Committee (MPCC) Legal Department thuchhuah tarlan danin CAG Report hian Mizoram-a Border District 6 (Paruk) awmah District 2 (pahnih), Lunglei leh Champhai chhuiin, heng District 2-a RD Block 7-ah pahnih chauh leh RD Block 2-a khua 77 awmah khaw 24 chiah thlang-chhuak lehin, heti zat lek khua a RD Department in BADP sum an hmanna an chhuiah hian sum leh pai tam tak fello leh diklo a hman a awm ngei a ni tih CAG chuan hmuchhuakin, FIR thehluh ni se tiin a Report-ah hian a rawt hial tih an tarlang a. CAG Report hi March 13, 2019 khan Assembly House-ah pharh a nih thu leh hetiang a mipui sum tam tak diklo taka hmangtute hi zawnchhuah a dan anga hrem an nih theih nan hma a la ta tih an sawi bawk.