Lok Sabha inthlanpui-a Vote tla chhiar turin Serchhip-ah inbuatsaihna kalpui mek a ni

Mizoram Lok Sabha inthlanpui neih a Vote tla te chhiar turin inbuatsaihna kalpui mek zel a ni a. Serchhip-ah pawh nimin khan inthlanpuia Vote tla chhiar tura ruat te tan hian training neih niin Lok Sabha inthlana Vote tla te chhiar tur hian Serchhip District-ah mi 99 ruatchhuah an ni.

April 11-a Mizoram Lok Sabha inthlanpui neiha Vote tla te tun thla ni 23-a chhiar tur hian Mizoram pumah inbuatsaihna kalpui mek niin Serchhip-ah pawh inthlanpuia vote tla chhiar tura ruat te tana training hmasa ber chu nimin khan Serchhip P&E Veng YMA Hall-ah neih a ni a, he hunah hian Serchhip DRDA Project Director, VL. Remliana, Thenzawl SDO (Civil), Pinky Zosangpuii leh SDO (Sadar), R. Vanrengpuia te chu Resource Person atan hman niin anni hian Vote chhiar tura ruat te hi an mawhphurhna hrang hrangte an hrilhfiah a. Lok Sabha inthlanpui-a Vote thlak chu tluang taka neih zawh a nih tawh thu sawiin, tunah hian Vote tla te chhiar tura inbuatsaih mek a nih thu a sawi a. Vote chhiar tura ruat te chu sawrkar in rintlak ah a ngaih te an nih angin an hna te chu \ha taka thawh tum turin a chah bawk.

Lok Sabha inthlanpui-a Serchhip District chhunga Vote thlakna atana hman, Electronic Voting Machine (EVM) leh VVPAT te chu Serchhip DC Office-a Strong Room-ah te venhimna khauh tak hnuaiah dah mek an ni a. He inthlanna a Vote tla te chhiarna tur atan hian Counting Hall pathum (3) ruahman niin Serchhip DC’s Conference Hall-ah hmun hnih (2) leh DC Office General Room-ah hmun khat siam a ni dawn a, Serchhip Constituency tana Counting Hall-ah hian Counting Table 6 dahin Tuikum Assembly Constituency tana Counting Hall-ah Counting Table 8 leh Hrangturzo bial tana Counting Hall-ah Counting Table 7 dah a ni dawn a. Vote tla te chhiar tur hian Counting Supervisor, Counting Assistant leh Micro Observer mi 33 \heuh, an vaiin mi 99 ruatchhuah an ni bawk a ni.

Lunglei-ah pawh nimin khan Lok Sabha inthlanpuia Vote tla chhiar tura ruat te tan hian training chu Convention Centre-ah neih a ni a. He hun hi James. Lalnithanga Election Officer Lunglei chuan kaihruaiin, TT. Lalnunmawia, District Level Master Trainer in EVM Carrier, Camera Men, Media Person leh Staff dang duty turte hnenah an tih tur leh tihloh turte zirtirna a pe a, Lalchhuanthanga Addl. SP Lunglei chuan Venhimna chungchangah zirtirna pe bawkin, hei bakah hian Election Deptt Official ten Vote chhiar hun atana hriat tur pawimawh hrang hrangte kalkhawm te hi an hrilh hre bawk a ni.