Medical Quarters kang-ah mi 5 in hliam an tuar

Nizan dar 6:30 vel khan Serchhip Zozam Veng-a Medical Quarters pakhat chu bungrua engmah chuh hmanloh in a kang a, kang \helhtu mi 5 in hliam tuarin mi 3 chu Serchhip damdawi In ah admit an ni.

He Quarters kang hi Health Department-a Driver, PC. Lalromawia te luah lai niin he In ah hian puitling leh naupang pathum ve ve, an vaiin mi 6 an khawsa a, kangmei hi an In hnuai a\anga in\an niin In hnuaiah hian Ar an vulh nia thudawn a ni a, In neitu in kangmei a chhuak tih  an hriat hi chuan \helh mih theih a ni tawh lo a, bungrua engmah chuh hman loha kangral in a bula dawr pakhat leh Garage-a Motor 4 dah te chu a him hlauh a ni.

He kangmei chhuak hi hriat a nih veleh Fire Department te hriattir nghal niin anni hian kang\helh Motor pahnih nen kangmei chhuahna hmun hi an pan nghal a, amaherawh chu thli a tam avang leh kangmei hi a chak bawk avangin vanduaina thlenna hmun an thlen hi chuan \helh leh ngaihna a awm tawh lo a. Kang\helh Motor a thlen hnu lawk hian eirawngbawlna Gas bur 1 chu a puak a, hetah hian mi 5 ten hliam tuarin Serchhip damdawi In panpui an nih hnuah mi 3 te chu admit an ni a. Damdawi In-a admit te hi Lalchhuanawma (36) s/o Lalthanzuala, Zozam Veng, Vanlalpeka (26) s/o Vanramduha, Veng-chung leh Huntharmawia (19) s/o Zohersanga, Vengchung te niin Lalchhuanawma hian a Lu ah hliam na tak a tawrh avangin nizan vek khan Serchhip damdawi In-ah zai nghal a ni a. Ser-chhip Fire Sub-Station-a SI, Lalbiaksanga (36) leh V. Lalrintluanga (46), Field Road te chu First Aid pek an nih hnuah In lama in enkawl tura chhuahtir leh nghal an ni.

He In kang-ah hian mihring nunna chan awm lovin In neitute hi him takin an chhuak thei a, an bungraw kangral zingah hian TV, Fridge, Puan\hui khawl, Steel Almirah leh thawmhnaw leh mutbu bakah pawisafai pawh a tel a ni.