Zu dawr neitu ten License ti thar mekin Serchhip-ah Zu dawr 2 hawn leh a ni dawn

Gauhati High Court Aizawl Bench thutlukna siam anga May 27, 2019 thleng Mizoram-a Zu dawr hawn leh theih a nih angin Serchhip-a Zu zawrhna dawr pahnih te chuan Zu dawr hi hawn zui zel an tum thu an sawi a, Zu dawr pakhat erawh chuan dawr hawn zui an tumlo thung.

Gauhati High Court Aizawl Bench in Zu zawrhna dawr te hawn tir leh tura a hriattirna bawhzuiin Mizoram sawrkar chuan Mizoram-a Bonded Warehouse leh Vendor te chu May ni 27 thleng license a tih nun sak leh mek a, kum kaltaa Serchhip-a Vendor hrang hrangte chu kan Palai in bekualin dawr pahnih te chuan sawrkar in License a tihnun sak leh theih anga Zu dawr hi hawn zui an tum thu sawiin, pakhat erawh chuan License tihnun zui an tumloh thu an sawi a ni.

Serchhip P&E Veng-a P&E Veng Wineshop leh New Serchhip-a SRV Wineshop te chuan tunah hian an License te chu an tihnun leh tawh thu sawiin, tunah hian ni 42 atan license hi tihnun a nih thu an sawi a, amaherawh chu nimin lam kha sawrkar Pisa chawlh a nih zui avangin Challan siam theih a nih loh avangin Zu erawh lak thar an la neilo tih an sawi a, Vawiin lamah Challan hi an tifel thei a nih chuan dawr a zawrh tur hi lain tunkar tawp-ah emaw, karleh tirah emaw chuan an dawr te hi hawn \an leh theih an beisei thu an sawi thung a. Tunah hian sawrkar kum kaltaa an Zu laksa chu tlem an la neih thu pawh sawiin, heng te hi tiral turin Lincese hi tihnun tho a \ul avanga an license hi tinung leh an nih thu an sawi bawk. Hetihlai hian Serchhip P&E Veng-a Wineshop pakhat awm \hin erawh chuan an license hi tihnun an tum tawhlo nia thudawn a ni a, anni hian sawrkar kum kalta a Zu an lak ah hralh bang an neih mumal lo nia thudawn niin, hei vang hian a thara ti leh tawh lovin an License pawh hi tihnun an tum tawhlo nia thudawn a ni bawk.

Tarlan tawh \hin angin Mizoram sawrkar chuan MLPC Act hnuaia Mizoram-a Zu zawrh chu tihtawp tumin Assembly-ah Dan thar a pass tawh a, hemi ang hian sawrkar Zu dahkhawlna leh Zu zawrhna dawr te license chu kumin March thla tawp rual khan pawhsei leh tihnun theihloh in a titawp a, hemi chungchangah hian Zu dahkhawlna dawr neitute chu Gauhati High Court Aizawl Bench-ah zualko in High Court chuan April 13 khan Order a tichhuak leh a, hetah hian Mizoram sawrkar chu Zu khapna dan thar hman theih a nih hma, May ni 27 thlenga Bonded Warehouse leh Vendor te License renew sak turin a ti a. Hemi ang hian April 15 a\ang khan an License hi Renew theih a nih thu thuneitute chuan an sawi a ni.

Thudawn danin tunah hian Phunchawng leh Zuangtui-a Warehouse-ah te chuan Mizoram-a lakluh sa Zu engemaw zat dahkhawl ala nih bakah Vendor te pawhin nikum lama an hralh zawh hmanloh an la kawl nual a, hetianga License tihnun leh theih a nih tak avang hian Aizawl-a Zu dawr \henkhat te chu nimin khan hawn \an a ni leh tawh bawk.