Serchhip Sub-Hqrs. YMA Rorel inkhawm neih ah Fa nei tam mi 17 te chawimawina hlan an ni

Serchhip Sub-Hqrs. YMA Rorel Inkhawm vawi 2-na chu nimin April 5, 2019 khan Serchhip P&E Veng YMA Hall-ah neih a ni a. He hunah hian hmalakna tur hrang hrang an rel bakah Sub-Hqrs. YMA huamchhunga Fa nei tam, fa 6 aia tam nei mi 17 te hnenah chawimawina hlan an ni.

Sub-Hqrs. YMA Conference neihloh kuma neih \hin Serchhip Sub-Hqrs. YMA Rorel Inkhawm vawi 2-na nimin-a neih ah hian Rorel Palai te chuan Sub-Hqrs. YMA President, R. Sanghmingthanga kaihhruaina hnuaiah rorelna neiin an YMA Khawih Agenda 6 leh Sawrkar Khawih Agenda 3 te chu sawiho a nih hnuah lungrual taka pawm vek a ni a. Heng Agenda an pawm zingah hian luidung leh luidung-a nungcha humhalh kawnga chak zawka hmalak rawtna te, Zu leh ruihhlo dona kawnga nasa zawka hmalak rawtna te, All India Services leh Central Service dangah Zofate a tam thei ang ber kan luh theih nana Central YMA in mi bik te \anpuia chhawmdawlna kawnga hmalak rawtna te, Hnam Incheina (Zo puan hrang hrang) humhalh kawnga inzirtirna zau zawk neih rawtna te, The Mizoram Fisheries Act a taka hman thuai a nih theih nana hmalak rawtna leh an Sub-Hqrs. YMA huamchhunga Thentlang to Lungpho, Khawlailung to Hmunzawl, Serchhip to Sailam, Rullam to Khawbel leh Chhingchhip to Sialhawk kawng siam\ha tura hmalak leh Kei\um to Khawlailung inkar Tuichang Lei dawh mek \ha taka zo thei tura hmalak rawtna te a tel a ni.

Nimin Serchhip Sub-Hqrs. YMA Rorel inkhawm ah hian chawhnu lamah Vantlang Inkhawm neiin he hun hi Central YMA President, Vanlalruata chuan he Rorel Inkhawm thupui, ‘Ram leh Hnam humhalh’ tih thupui hmangin thu a sawi a. He hunah hian Mizote kan lo pun lehzual theihna tura inzirtirna atan kum kalta chhunga Serchhip Sub-Hqrs. YMA huamchhunga fa nei tam fa 6 nei chin, an fa naupang ber nikum chhunga piang mi 17 te hnenah Chawimawina an hlan a, hetiang bawk hian nikum lamah pawh Fa nei tam te hnenah hian chawimawina an lo hlan tawh a ni.

Nimin a Serchhip Sub-Hqrs. YMA Rorel Inkhawm ah hian kum kalta chhunga YMA Member boralte sunna hun hmangin Report a\anga a lan danin Serchhip Sub-Hqrs. YMA hi June 18, 2008 khan hawn niin Conference vawi 6 nei tawhin Rorel Inkhawm \um 2 neih a ni tawh a, an Sub-Hqrs. YMA hnuaiah hian YMA Branch 77 awmin Group YMA pathum (3) a awm a, tunah hian an huamchhungah YMA Member 23,154 awmin heng zinga 665 te chu Life Member an ni a, kumthar 2019-2020 atana Sub-Hqrs. YMA Budget Rs. 10,64,500/- chu pharhin lungrual taka pawm a ni bawk.