Election Model Court of Conduct zawh rualin Zu zawrh mek tihtawp a ni dawn - END Minister

Excise & Narcotics Department changtu Minister, Dr. K. Beichhua chuan High Court thu anga Zu zawrh mek chu Election Model Court of Conduct zawh rual thla thar, May 27 ah tihtawp a ni dawn tih a sawi a. Hetihlai hian Mizoram a Bonded Warehouse te chuan Vendor te hnenah Zu an hralhchhuak leh \an mek tawh thung.

Excise & Narcotics Minister Dr. K Beichhua hian Ningani chawhma lam khan MLPC Act hnuaia Mizoram-a Zu dahkhawl phalna nei- RTP Bonded Warehouse, Phunchawng leh Rafael Bonded Ware, Durtlang Leitan Muana Veng bul a mi te chu a hmunah kala tlawhin Zu chhekkhawl sa an la neih te a enfiah a, he hunah hian Excise Minister chuan Mizoram sawrkar chuan a lo sawi lawk tawh ang ngeiin Zu zawrh a tihtawp tur thu sawiin, High Court Order zawh, Election Model Code of Conducts zawh ruala tihtawp a nih tur thu leh Notification tihchhuah anih tur thu a sawi bawk.

Hetihlai hian Gauhati High Court, Aizawl Bench in May ni 27 thlenga Bonded Warehouse leh Vendor te License renew sak tura Order a tihchhuah tawh angin Nilaini a\ang khan Mizoram-a Bonded Warehouse te chu hawn \an leh niin Rafael Bonded Warehouse chuan Wine Vendor te hnenah a pe chhuak leh \an tawh a, RTP Bonded Ware House chuan Ningani a\angin an Zu dahkhawlsa te an pechhuak ve thung a. SS Bonded Warehouse, Phunchawng erawh an la in hawng lo niin thudawn a ni thung.

Mizoram-a Bonded Warehouse pathum ah hian Zu stock sa engemawzat a la awm a, RTP Bonded Warehouse-ah Sapzu (IMFL) case 1227 leh Beer case 2909, a vaiin Case 4136 awmin Rs.78,17,164/- man hu a ni a. SS Bonded Warehouse, Phunchawng-ah IMFL case 4407 leh Beer case 543, a vaiin case 4950 awmin heng te hi Rs.1,12,87,095/- hu a ni a. Zu lakkhawlsa ngah ber, Rafael Bonded Warehouse-ah IMFL case 30,871 leh Beer case 4410, a vaiin case 35,281 awmin heng te hi Rs.14,26,95,578.44/- man a ni bawk.

Tun dinhmunah Mizoam chhungah phalna neia zu zuar (wine vendor )  25 an awm mek a, tuna High Court Order anga Zu an zawrh theih hun hi thla thar May ni 27-ah a tawp ang.