District Park-ah Silai kahna hmun siam thar a ni

Serchhip District Park tihchangtlunna atan Shooting Range siam thar a ni a, hei hi Inrinni khan Serchhip District MJA member te chuan tlawhin Serchhip District Rifles Association hruaitute pawhin an telpui bawk.

MJA Serchhip District Member ten Serchhip District Park an tlawhna ah hian Serchhip District Local Administration Officer, H. Lalhruaitluanga chuan Ser-chhip Dawngzawl-a District Park chu tih changtlun tuma hma an lak ve zel thu leh Tuikhuah awmah Lawngleng (Kayak) dahin Futsal khelhna tur Ground an siam bakah Silai inkahsiakna turin Shooting Range an siam leh thu hi a sawi a. Mizote chuan a hmei-a pa in Silai kan lawm tih sawiin, Sports a nihna anga kawng dik-a Silai kan hman theihna turin he Silai kahna hmun hi siam a nih thu a sawi a. Silai kah lama tuimi te chuan Shooting Range hi hmang \angkaiin an thiamna te tihpun nan hmang se a duh thu a sawi a, he Silai kahna hmun hi man chawi a duh apiangte hman theih tura dah a nih dawn thu a sawi bawk.

He hunah hian Serchhip District Rifles Association Vice President, Lalbiakdika pawhin Silai kah hmanga infiamna tih hmasawnna tura hetiang hmun buatsaih a ni chu lawmawm an tih thu a sawi a, tunah hian SDRA chuan Shooting Gallery neiin Meter 10-a hlaa silai inkahsiak theih a nih thu leh tuna an siam thar-ah hian meter 50 thlenga intihsiakna neih a nih dawn thu a sawi bawk.

He hunah hian MJA Serchhip District President, C. Ramengmawia pawhin hetianga District Park tih hlutna tura ngaihtuahna sengtu Officer kan nei chu lawmawm a tih thu sawiin, mipuite pawhin chhawr \angkaiin uluk takin enkawl se \ha a tih thu a sawi bawk.

Serchhip District Park-a Shooting Range a dah tur hian Airgun 4 lei nghal niin heng te hi enchhinna neih nghal a ni a, a duh apiangte hman theih turin dah nghal a ni bawk.