Bru tan Special Polling Station siam a ni dawn; NGO ten tiamchin awmlo Total Bandh an tintuah

Tripura Bru Relief Camp-a awm mek Bru-te’n Lok Sabha inthlanpuia vote an thlak theih nan Mizoram chhungah Special Polling Station 15 bun a ni dawn a. Hetihlai hian Mizoram NGO Coordination Committee chuan Tuikuk Tripura Transit Camp-a awm Bru te Electoral Roll-a an hming chuanna ngeia Vote thlak tir tura nawr nan tun thla ni 8 a\angin tiamchin awm lova Total Bandh nei turin an rel thung.

Inrinni khan Mizoram Addl. Chief Electoral Officer, Krishna Mohan Uppu chuan thuchhuah siama Bru Realief Camp-a awm te tana Special Polling Station siam tur chungchang hi sawiin, Special Polling Station hi Kanhmun-ah vek siam a ni dawn a. Special Polling Station hi Hachhek Assembly Constituency-a vote nei Bru Relief Camp-a awm mi 5,020; Dampa-a vote nei mi 935 leh Mamit bial-a vote nei 3,101 te tan Kanhmun YMA Playground-ah Polling Station (PS) 5 siam a ni ang a; Tuirial Constituency-a vote nei mi 659, Kolasib bial-a vote nei mi 456 leh Serlui bial-a vote nei mi 823; Lunglei South bial-a vote nei mi 44, Thorang bial-a vote nei mi 344 leh West Tuipui bial-a vote nei mi 559 te tan Kanhmun Field Veng Badminton Indoor Stadium-ah Special Polling Station siam a ni bawk ang. Tripura Relief Camp-a awm Bru zingah hian Mizoram Electoral Roll-a chuang-a Vote nei thei hi an vaiin 11,941 an ni a. Inthlan vote thlak ni, April ni 11 zing dar 7:00 a\anga tlai dar 5:00 thleng vote an thlak thei ang.
Tarlan tawh \hin angin nikum kumtawp-a Mizoram Assembly inthlanpui-ah khan Tripura Bru Camp-a awm te tan hian Kanhmun-ah Special Polling Station siam a ni tawh a, heta Vote thlak tura Camp a\anga rawn kalna senso hi State sawrkar in a tum niin an kalna tur Motor erawh Tripura sawrkar in a ngaihtuah thung a, he Special Polling Station-ah hian Bru \hahnem takin vote an thlak a ni.
Hetihlai hian Mizoram NGO Coordination Committee chuan Tuikuk Tripura Transit Camp-a awm Bru te Electoral Roll-a an hming chuanna ngeia Vote thlak tir tura nawr nan tun thla ni 8 a\angin tiamchin awm lova Total Bandh neih nise an ti a. Mizoram-a tlawmngai pawl hrang hrangte telna, NGO Coordination Committee hi nimin khan Aizawl-ah \hukhawmin kan hma lawka MP inthlan lo awm turah Tripura Transit Camp-a Bru awmte tana Special Polling Booth siamsak an nih leh chuan Mizoram pumah inthlanna muanawm leh tluang taka neih a nih loh nan hmalak \ha a lo tih tawh chu bawhzui dan tur an ngaihtuah a. Election buaipuitute leh Sawrkar lamin Kanhmun-ah Tripura Transit Camp-a awm te tan Special Polling Booth a siam mek chu \ha an tihloh thu sawiin, Tripura Transit Camp-a awm mek Bru te Mizorama Electoral Roll-a an chuanna Polling Station \heuhah vote thlak tir turin an ngen a, he an ngenna hi tih hlawhtlin theih nan tun thla ni 8, karleh Thawh-\anni a\ang khian tiamchin awm lovin Mizoram pumah Total Bandh huaihawt turin an rel a ni.
NGO \hukhawm chuan Sipai phurhkhawm nan leh Election Duty atana Commercial Vehicle leh Private Vehicle te Election buaipuitu ten a mankhawm pawh che chhuak tawh lo tura ngenin Election kaihhnawih atana hman lo remti lo turin an ngen nghal bawk a. Tuikuk awm \ha duhlo vawi tam tak Mizoram-a let tura tih pawh a let duhlo te avanga Mizo mipui leh Mizoram Sawrkarin harsatna a tawk ngun ta lutuk chu pawi an tih thu an sawi a, he an Total Bandh neih tur hi thawp vek turin Mizo mipuite an beisei tih an sawi bawk.
Kar kalta Zirtawpni khan Central YMA hruaitute chuan Chief Minister, Zoramthanga chu hmuin an thilphut hi an lo sawipui tawh a, Chief Minister chuan Central YMA hruaitute chu Lok Sabha inthlanpui Boycot lo tur leh tluang taka inthlan neih chu Sawrkar duhdan a nih thu leh an thu thlen te chu hotu sangte a lo sawipui tur thu a lo hrilh a ni.

Comments

Popular News (Last 30 Days)

Serchhip DCSO sawn a ni