Zirtirtu indaihlohna tireh turin sawrkarin hma a la

Zirtirtu lak turah politics a inrawlh tur a nilo - Edu. Minister

Education Minister, Lalchhandama Ralte chuan zirtirtu indaihlohna tireh turin sawrkarin hma ala mek tih sawiin, zirtirtu hnalak turah a thiam thiam lak tur an nih thu leh politics a inrawlh tur a nih loh thu a sawi a. Tun dinhmun ah Mizoram hmun hrangah zirtirtu indaihlohna a nasa hle tih a sawi bawk.

Nimin a Assembly Session chhunzawm-ah zawhna leh chhanna huna Aizawl North-I bialtu MLA, Vanlalhlana zawhna chhangin School Education Minister, Lalchhandama Ralte chuan, zirtirtu indaihlohna tireh turin tuna zirtirtu post ruak tam tak hnawhkhah loh awm mek te chu hnawhkhah tum mek a nih thu a sawi a, tunah hian Primary zirtirtu post ruak 94 hnawhkhahna turin MPSC in Written result chu 1.2.2019 khan a tichhuak tawh a, interview chu 13th - 27th March, 2019 ah neih tur a nih thu a sawi a. Middle School-ah post ruak 58 hnawhkhahna turin MPSC chuan Written result 1.2.2019 vek khan ti chhuak tawhin, 4th-12th March, 2019 khan Personal Interview neih a nih thu a sawi bawk.

Heng te bakah hian High School zirtirtu 164 contract a lakna tur buaipui mek a nih thu leh heng baka post ruak tam tak la awmte chu hnawhkhat turin hmalak zel a nih thu Education Mnister chuan a sawi a. School Education Minister chuan Chief Minister remtihna in Zirtirtu indaihloh zualpui phuhruk na atan MR Teacher \hahnem tak lak tum a nih bawk thu a sawi a, heng MR Teacher lak tuah hian dan in a phut ang ngei a tling te lak an nih tur thu a sawi bawk.

Education Minister Lalchhandama Ralte chuan, zirtirtu lak turah Politics a inrawlh tur a ni lo tih chu a ngaihdan a nih thu sawi bawkin, MPSC hna lak mekah pawh lenchilhtu te pawh an awm ve thu a sawi a, zirtirtu atan hian a thiam thiam lak tur tih chu a ngaihdan a nih vangin sawipui neih a tum loh thu leh Zirna ah inelna thianghlim \halaiten an neih theihna turin dik takin hna lak a ni tur a ni a ti bawk.

Tun dinhmunah Mizoram hmun hrangah zirtirtu indaihlohna a nasa hle tih Education Minister, Lalchhandama Ralte chuan sawiin, zirtirtu post ruak 2300 chuang a awm mek tih sawiin, zirtirtu an lo indaih zawk theihna turin Muster Roll Teacher \hahnem tak lak an nih tur thu leh heng zirtirtu lak tur ah pawh hian a thiam leh tling te ngei, dan in a phut ang ngei a tling te chauh lak tur an nih thu a sawi.