MNF ten Independent an puanni cham denchhenin Aizawl-ah ‘Mizo National Day’ hman a ni

MNF chuan nimin khan Aizawl-a Mizo Hnam Run-ah ‘Mizo National Day’ an hmang a, he Ni hi kum 1966 March ni 1-a Zofate'n zalenna famkim kan neih theihna tura MNF ten Independent an puanni denchhena hman \hin ni mah se kumin hian Chapchar Kut nen a inrual avangin nimin khan hman a ni ta zawk a ni.

Nimin-a Aizawl Mizo Hnam Run-a ‘Mizo National Day’ hmanna ah hian MNF President leh Chief Minister, Zoramthanga chuan ‘Lalpa rawngbawl duh ram leh hnam chu an dingchhuak ang’ tih a ni tih sawiin, chu chu an tum a nih thu a sawi a. “Pathian rawngbawlin Amah \ihna nen hna kan thawk anga, kan dingchhuak bawk ang,” a ti a. “Mizo Nationalist movement hi ral ngei ngeina tura ngaih ah vawi tam tak a damchhuak tawh a. Pathian rawngbawl tum tlattu kan nih avang chauha dam khawchhuak kan ni,” a ti bawk.

MNF President chuan, India sawrkar-in Mizote a beih tluka nasa in tumah a bei lo tih sawiin, “MNF movement a len tak tak hmain he Nationalism Movement hi hmehmih tumin India sipai an rawn thawk chho a. Mizo Nationalism tihchhiat vek tuma sipai an lo chhoh takah hian MNF-in kawng dang a nei ta lo a. Chuvangin, zalenna sual turin keimahni leh keimahni inphelhin zalenna atan kan inpe ta a ni,” a ti a. “Citizenship Amendment Bill chungchang Home Minister ka sawipui pawhin Mizoram chu India-ah kan awm ngai lo, 'excluded area' kan nih thu ka sawi a. British-in min chhuahsan dawnin India rama tel zel nge kan duh Burma zawm; East Pakistan lama beh nge Crown Colony a awm, nge independent-a awm tiin ngaihdan insual a awm a. Chutah British an chhuak a, kan tel ve lohna Constitution min barhlui a. Kum 1966-a zalenna suala kan kalchhuahna kha hei hi a chhan a ni reng a ni. Tichuan, kum 20 kan inkap a, inbiakna a lo awm khan 'Mizoram a tel ve dawn a nih chuan ram leh hnam leh sakhua inhumhimna kan duh' tih kan sawi a, kan rawn tel ve chauh a ni,” a ti bawk.

MNF President chuan mi \henkhat ten ‘MNF ten zalenna an sual lo’ tih an sawi \hin tih pawh sawiin, “Sawrkar hran neiin Army, Court, Parliament, Civil Administration etc. neiin kum 20 chhung kan kal. Sawi sawi chi a ni lo, zalenna kan sualzia chu an pute ber hian an hrechiang em em a ni,” a ti bawk.

Nimin a Mizo Hnam Run-a Mizo National Day an hman hi an Treasurer, Vanlalzawma chuan kaihruaiin Martar-te sunna leh zahna hun hman a nih bakah tunhnaia Home Minister zinna a zuitu zinga lirthei chesual-a nunna chan te sunna hun hman a ni bawk.