Mizoram Lok Ayukta Chairman tur ruat fel ta

Mizoram sawrkar chuan Lok Ayukta Chairman atan IAS Retd., C. Lalsawta a ruat.

Lok Ayukta Chairman atana C. Lalsawta ruatna hi Mizoram Larsap chuan Mizoram Lok Ayukta Act 2014, Section 4(1) tlawhchhanin a chhuah a, C. Lalsawta hian he hna hi a zawm a\anga kum 5 chhung a chelh thei dawn a, amaherawh chu, kum 5 a thawh hmaa kum 70 a tlin hman erawh chuan a chawlh a ngai dawn a ni. Lok Ayukta hi Chief Minister a\anga a hnuailam Minister dang zawngte corruption thil ti nia hriat an niha an chungchang chhuitu tur leh hremna pe theitu tur a ni.

C. Lalsawta hi Reiek khua loneitu Ngama leh Laithangpuii te fapa a ni a, Shillong-a St. Edmund’s College-a BA a zawh hnuah UPSC hnuaia Civil Services exam-na ah telin IA&AS-ah a inziaktling phawta, chumi hnuah Civil Service exam-na bei zui zelin kum 1981 khan IAS-ah a inziaktling leh a, Bihar Cadre-ah dah a ni a, a hnathawh chhung hian hming\ha tak leh rinawm taka hnathawkin Mizoram-ah pawh kum 2008 a\anga 2011 thleng khan Principal Secretary, Finance, GAD leh a dangte changin a lo thawk tawh a, Bihar-a a letleh hnuah pawh Bihar-ah Principal Secretary te, Planning Board Adviser te leh Chief Secretary tlukpui Vigilance Commissioner-ah te dah a ni a, kum 2015 September khan Superannuation pension-in a chhuak a ni.

Kum 2014 a hman theih tura dan a pass a nih hnuah Mizoram Lok Ayukta hi a taka kalpui a la ni lova, pawl \henkhatin kalpui turin sawrkar an nawr hle a, Lokayukta dinna atan hian Mizoram sawrkar pawhin hma la chho ve zelin kum 2016-2017 budget-ah khan cheng nuai 159.34 a dah a. Tunah chuan Mizoram Lok Ayukta chu a taka kalpui theih a ni dawn hnai ta niin a lang a ni.