Mizoram State Lokayukta Chaiman hmasa ber atan C. Lalsawta, IAS (Rtd) lakluh a ni ta

Mizoram State Lokayukta Chaiman hmasa ber ni turin C. Lalsawta, IAS(Rtd) chu nimin tlai khan Mizoram Larsap, Prof. Jagdish Mukhi chuan rinawmna thu tiam tirin a lalut.

Eiruk dona kawnga mawhphurhna leh dinhmun pawimawh tak, Lokayukta Chairman lakluhna inkhawm hi nimin tlai dar 4:00 khan Raj Bhavan Durbar Hall-ah neih niin Chief Secretary, Lalnunmawia Chuaungo chuan a kaihruai a, he hunah hian Chief Minister, Zoramthanga, Speaker Lalrinliana Sailo, Cabinet Minister te, Minister te, MLA te, Secretary te leh sawmbik te an tel a ni.

Kum 63 a upa C.Lalsawta hi Ngama leh Laithangpuii te fa niin Reiek khua-a piang leh seilian a ni a. Primary leh Midddle School chu Reiek-ah a zirchhuak a, St. Edmund’s College-ah PU leh St. Anthony’s College-ah BA (Hons) a zirchhuak a ni. Hun rei tak chhung sawrkar hna thawk tawhin tawnhriat a ngah bakah a hnathawh chhung hian hmingchhiatna a nei lo a, Syracuse University, USA-ah Advanced Studies in Public Administration a zirchhuak a. UNO in a din, Institute of Public Enterprises, Ljubljana, Slovenia-ah leh Harvard University, Cambridge, USA-ah te a zirchhuak tawh bawk a ni.

C. Lalsawta hian Central Service (IA&AS) ah kum 2 leh All India Service (IAS) ah kum 34 thawkin kum 40 chuang nihna hrang hrang a chelh tawh a, District DC leh Divisional Commissioner hna a chelh chhung hian Appellate/ Revisional Court-ah Quasi-Judicial order te pass in case tam tak a chingfel a, sawrkar hnathawkte disciplinary case tam tak a chingfel bawk. Chief Secretary tlukpui (IAS Apex Scale) a nih hian hlemhletna dotu pawl (Vigilance) hotuah dah a ni tawh bawk a, eirukna leh hnathawh \ha lo - corruption chi hrang an dona kawngah hian IAS leh IPS Officers bakah Head of Department engemawzat pawh case awrhtir an ni a, thamna la leh lak tum leh, sawrkar sum tichingpen te, hnathawhah hlemhle tam tak an man bawk a ni.