Mizoram Legislative Assembly 8-na Budget Session hmasa ber neih \an a ni ta

Mizoram Legislative Assembly 8-naa Budget Session hmasa ber chu nimin khan neih \an a ni a, Session \an Ni hian Mizoram Larsap, Prof. Jagdish Mukhi chuan House-ah thu a sawi a. Larsap thusawi chungchanga lawmthu sawina Motion chu putluh nghal niin Vawiin ah he Motion hi sawihona neih nghal a ni ang.

Nimin a House chhunga thu a sawina ah hian Larsap chuan House zahawm taka thu a sawi thei chu lawmawm a tih thu sawiin, House member-te leh Mizoram mipuite chibai a buk a. Mi tling tak tak House member-te kaihhruaina hnuaiah Mizoram chuan remna leh muanna tluantling hnuaiah sum leh pai leh hmasawnna kawng tinrengah hma lam pan zelin, eng tikah emaw chuan ram chhunga state changkang ber dinhmun a la luah ngei a rin ngheh tlat thu a sawi a. A sawrkar chuan mipuite hnenah kawng tinrenga sawrkar, hnathawk chak tak, mawhphurhna la ngam leh langtlang sawrkar pek a tum thu sawiin, sum leh paia intodelh sawrkar, mi dang chunga innghat lo, Lo neih leh hmunhma dinna kawnga hmasawnna thlentir a, thil siamchhuah lamah, a bikin duhtawka hman tur awm sa Mau hmang \angkaia hmasawnna thlentir leh \halaite theihna tihpunsaka infiamna leh anmahnia sumdawnna an kalpui theihna tur ruahmana siamsak chhoh zel a tum thu a sawi bawk.
Sawrkar chuan Flagship Programme thar - Socio-Economic Development Policy (SEDP) a kalpui thuai tur thu sawiin Larsap Prof. Jagdish Mukhi chuan, SEDP-in a tum ber chu khua leh tui \anpui ngai zawng zawngte sum leh pai leh hriselna lama tuamhlawm a ni a, hemi tihlawhtling tur hian Committee 14 din a ni tawh a, anni hian a kaihhnawih Department-te nen inrawnin ruahmanna an siam dawn a ni, a ti a. Sawrkar chuan mipui an thlamuan theihna tura dan leh hrai \ha taka kenkawh chu a ngaih pawimawh ber a nih thu sawiin, Mizoram chu ram chhunga state ralmuang berte zinga mi a nih chhunzawm zel theih nan hma lak a ni ang, a ti bawk.
Hun rei tak chhung Mizo mipuiin nghak-hlel taka an lo thlir \hin, Aizawl khawpui laili a\anga Assam Rifles Battalion Hqrs. sawn chhuah chu hun reiloteah tihhlawhtlin a nih tawh dawn thu sawiin Larsap chuan, Sawrkar laipui Ministry of Home Affairs chuan Assam Rifles te chu Aizawla an Battalion Hqrs. chu Zokhawsang-ah May ni 31 hmaa sawn chhuak turin thu a pek tawh thu leh Assam Rifles-te ram luah, mipui tana hman \angkai duhna rilru chu a tak a chang thuai dawn tih a sawi bawk.
Larsap chuan hna thawhna tur hmunhma leh inkalpawhna kawngpui pawimawh zia hriain a sawrkar chuan state chhunga inkalpawhna kawng zawng zawng leh State dangte nena inkalpawhna kawngpui \ha a awm theih nan a tih theih awm zawng zawng a ti vek dawn tih Larsap chuan a sawi a. Kawlphethaa intodelh turin hma a la dawn a, a bikin Nizung chakna leh kiam ve theilo chakna thahrui hrang hrang hmanga kawlphetha siam chhuah chu ngaih pawimawh a ni ang, a ti bawk.
Zirna pawimawh zia hriain a sawrkar chuan zirna peng tinah zirna tihhmasawn nan ruahmana thar siam a tum thu leh vantlang nunphung milin School kai \an leh a nih veleha hman \an turin School \an hun pawh tihdanglam a nih thu Larsap chuan a sawi a. Vantlang mipui an lo hrisel zawk nana hmalakna hrang hrang tihhmasawn chu a sawrkarin a ngaih pawimawh thu pawh sawiin,  Aizawl khawpui chei\hatna tur sum, cheng Vbc. 500 hmangin sawrkar kumthar lamah chuan Aizawl khawpui hmun hrang hrang hmelhmang chu thlak danglam hlawk a ni ang tih a sawi a. Zu zawrh phalna dan, The Mizoram Liquor (Control & Prohibition) Act, 2014 chu titawp turin hma a la mek tih pawh sawiin, Zu leh ruihhlo avanga chhiatna thleng mek ti ziaawm turin ruahmanna siam a nih thu a sawi bawk.

Comments

Popular posts from this blog

PAN CARD an tih teh fo hi - Laldinpuia