Inthlanpui atan inbuatsaih

Thla thar April ni 11-a Lok Sabha MP thlanna lo awm tur leh Aizawl West-I Assembly bial-a by-election neih tur atan Political Party hrang hrangte an inbuatsaih mek a, hun reilote ah Candidate tur pawh hriat kim theih beisei a ni.

MNF Candidate puang dawn :

Election Commission of India in Seat khat awmna, Mizoram-a Lok Sabha inthlanpui leh Aizawl West-I biala Assemly by-election neih hun tur a puan hnuah rorellai MNF Party chuan an candidate tur hi an tifel thawkhat tawh a, Vawiin hian Aizawl Mizo Hnam Run-ah an candidate puanna hi an nei dawn a ni.

Congress leh ZPM thawkdun dawn :

Hetihlai hian eptu party Congress leh ZPM te chuan he inthlanna neih tur atan hian nimin khan inbiakna neiin ‘April ni 11-a MP inthlan leh Aizawl West-I bial-a MLA by-election lo awm turah hian India rama secularism vawn him duh apiang \angho a, mipui candidate siam ni se’ an ti a, Secularism vawn him duh zawng zawngte \angrual turin an sawm nghal bawk. Hemi hnu nimin tlai khan pawl pahnih te hian inbiakna nei lehin inremna siam zui nia thudawn a ni a, hemi ang hian Aizawl West-I bial-a Assembly by-election neih turah ZPM in Candidate an siam anga, Lok Sabha MP thlanna neih turah Congress Party in Candidate an nei dawn thung a ni.

BJP in Candidate neih tum :

BJP Mizoram Pradesh President, Prof. JV. Hluna pawhin nimin khan Aizawl-ah thuthar thehdarhtute kawmin heng inthlanpui pahnih lo awm turah hian Candidate an nei dawn tih a sawi a, heng inthlanna neih tur atan hian Mizoram State Election Management Committee chu ruat an nih tawh thu a sawi a. Mizoram chhunga an party member zawng zawngte pawh theihtawp lo chhuah tur leh vote nei zawng zawngte an Official candidate vote pui turin a sawm bawk.