Sawrkar chuan Zu leh ruihhlo do hi ngaih pawimawh berte zingah a nei chho dawn - Excise Minister

Excise & Narcotics Minister Dr. K. Beichhua chuan Zu leh ruihhlo do chu sawrkar chuan ngaih pawimawh ber te zingah a nei chho dawn tih a sawi.
Mizoram Excise & Narcotics Service Association (MENSA) General Conference vawi 16-na nimin-a Commissionerate of Excise & Narcotics Conference Hall-ah neih khuallian nia a hmanpuina ah he thu hi sawiin Excise Minister, Dr. K. Beichhua chuan Cabinet an \hutkhawm pawhin Chief Minister berin hmasawnna kaihhnawih thildang aiin a sawi hmasak zawk chu ruihhlo do chungchang a nih thu sawiin, Sawrkar kumthar, April thla a\ang chuan ruihhlo do chu sawrkar hmalakna pawimawh tak a nih dawn avangin Excise & Narcotics Department chu an pawimawh hle dawn a, hei hi sawrkar hna satliah anga ngai lovin, ram leh hnam chhanchhuahna hna, Pathian rawngbawlna anga ngai turin END officers and staff zawng zawngte chu taksa leh rilru-a inbuatsaih lawk a ngai tih a sawi bawk.
Excise & Narcotics Department chu Mizoram khawtlang nunphung enkawltu an nih thu sawiin Minister chuan, “Prohibition kenkawh chu thil harsa leh mawhphurhna rit tak a ni dawn tih hriat sa a ni a; Kohhran, NGO leh Political Party te dem hlawh ber tur, an pet kual ‘ball’ ber tur chu Excise & Narctics Department hi a ni leh dawn,” a ti a. He Department changtu Minister a nih angin amah ngei pawhin a rilru a inbuatsaih tawh angin department-a thawk zawng zawngte pawh taksa leh rilruah lo inla ‘fit’ turin a chah a. Zu leh ruihhlo do tura tuna Excise & Narcotics Department hnuaia thawktu mi 300 velin an enkawl zo dawn loh avangin a theih anga rangin post ruakte hnawhkhah vek tum a ni tih a sawi a, heng post luah turin ruihhlo laka ram leh hnam chhanchhuah hna thawk duh Mizo \halaite lo inpeih turin a chah a. “Ram dang, state dangin ralthuamin kan \halaite an bei lo, an hmanrua chu Zu leh drugs zawk a ni,” tiin ruihhlo do kawngah sawrkar chuan Kohhran leh Central YMA te pawh a thawhpui dawn tih a sawi a, chuvangin tumah zam lovin, hnehna chang ngei turin sawrkar, Kohhran leh NGO ten beihpui thlakho a ni ang, a ti bawk.
He hun hi Excise Commissioner, Ngurchungnunga Sailo pawhin Khual Zahawm nia hmanpuiin Prohibition Dan tihdanglama kalpui leh tum a nih thu sawiin, Excise & Narcotics Department hnathawk zawng zawngte chu an hna \ha taka an thawh theih nana mahni hriselna ngai pawimawh turin a chah bawk.
Excise & Narcotics Department hnuaiah hian post awm zawng zawng chu 515 a ni a, chunga zingah post 119 a ruak a ni. Tuna thawk mekte bakah CTI, Sesawngah Training nei mek mi 50 an awm bawk.

Comments

Popular posts from this blog

PAN CARD an tih teh fo hi - Laldinpuia