MZP in School \an hun tih danglam dodal tum

Mizo Zirlai Pawl (MZP) General Hqrs. chuan sawrkarin School \an hun sawn tur chungchangah ngaihtuahna a seng \an a, ram hmasawnna hmel thar leh \ha zawk tura zuanluh mek lai a, hnungtawlh zawnga kal leh tumna a awm nia sawi rik chu pawi an ti takzet tih a sawi a, sawrkarin School \an hun a her danglam leh dawn a nih chuan na taka dodal nise an ti bawk.
MZP hian nimin khan Aizawl-ah General Executive Meeting neiin hemi hnua thuchhuah an siamah School \an hun sawn hma chungchang hi kum 2010-a MZP leh North East Students' Organisation (NESO) \angkawpin 'Separate time Zone for North East' tih thupui hmanga Seminar a buatsaih a\anga ngaihdan lo piang chho \an a ni tih an tarlang a, hemi avang hian hmarchhak a chengte tan 'Hunbi hran siam ni se' tiin Zirlai pawl ten sawrkar laipuiah rawtna an lo thlen tawh \hin a. Amaherawh chu sawrkar laipuiin hma a lak loh avangin, sana herh hma lova thil tih hun \an hma mai chu Nieng hmuh hun chhung hman \angkai dan awlsam ber tur a nih dawn avangin, a bul \an nan zirlaite tan School \an hun sawn hi a \ha hleah an ngai tih an sawi a, School \an hma chungchang ah hian mipui leh zirlaite pawh an kal thiam hle tawhah MZP chuan a ngai a, ram hmasawnna hmel thar leh \ha zawk tura an zuanluh mek lai a, hnungtawlh zawnga kal leh tumna a awm nia sawi rik chu na taka dodal ni se an ti tih an tarlang bawk.
MZP thuchhuah chuan khawvel ram hmasawn mek ten rim taka hna an thawh avanga hmasawnna hrang hrang an neih dan te, hmasawn tura thawhrim a ngaihziate thlir chungin, tuna inrelbawlna hrang hrang a\anga nasa zawk leh rim zawka Mizo mipui ten hna an thawh a, hmasawnna kawnga ke an pen \ul tawh hlein MZP chuan a hria tih an sawi a. Chumi tur chuan, zirna In-a zirlaite pawhin he rilru hi an put theih nan leh sawrkar pawhin hma a lak \hin anga, uar zawka hma a lak zel theihna hmanrua atan School \an hun sawn hma hi MZP chuan \ha a la ti zel, an ti a ni. Khawvel hmasawnna chi hrang hrang karah, zinga rei tak tak mut hian hmasawnna a thlen lo a ni tih te ngaihtuahin, School \an hma a nih hian chhung tin in taimakna leh hlawhtlinna kawng an zawh a ni tih chu MZP ngaihdan a ni, an ti bawk.
Hei bakah hian nimin a MZP \hukhawm hian kumdanga an lo hman \hin, India Sawrkar in Mizote dimna tel miah lo a Bomb hmanga a beihna ni, March 5-ah ‘ZORAM NI’ chu uar leh zuala hman leh ngei \ha an ti a. Central sawrkar in Mizoram hmun hrang hrang Sipai tha chakna hmang leh Jet Fighter nen a beih chiam avanga Mizoram tawrhna rapthlak leh lungchhiatthlak tak mai chu \hangtharte leh Mizoram mipui hian a theihnghilh mai an hlau tih an sawi bawk.

Comments

Popular posts from this blog

Tukverh-a tlasual boral