May 31 hmaa Assam Rifles insawnfel turin rawn ti

I&PR Minister, Lalruatkima chuan Union Home Ministry chuan Aizawl khawpui chhunga Assam Rifles-te May ni 31,2019 hmaa Zokhaw-sanga insawn fel vek turin a rawn ti ta tih a sawi.

Nimin-a Aizawl Mizo Hnam Run-a MNF Chhung Inkhawm neih ah I&PR Minister, Lalruatkima hian thu sawiin Chief Minister, Zoramthanga'n Central-a hotute hnenah Assam Rifles sawn-chhuah chungchang a sawi hnuah Feb. 14, 2019 khan 'Assam Rifles sawn chhuah' chu Agenda pui bera neiin Additional Secretary (Police) hova Meeting neiin Delhi-ah an rel nghal tih a sawi a, heta an rorel thutlukna angin Feb. 19, 2019 khan Home Ministry chuan Order a tichhuak ta a. Home Ministry order chuan Aizawl khawpui chhunga Assam Rifles-te May ni 31,2019 hmaa Zokhawsanga insawn fel vek turin a rawn ti ta tih a sawi.

I&PR Minister chuan Assam Rifles insawnchhuak tura tihna hi Oct. 13, 2007 khan tihfel alo ni tawh tih sawiin, hmalatu ber MNF sawrkar a tlak tak avang khan tumah bawhzuitu an awm ta lova, sum pawh cheng vbc. 117 zet sanction a lo ni tawh nghe nghe tih a sawi a. “Khatih lai a\ang tawh khan Assam Rifles hmun hi mimal ram atana sem hlauhthawnna mipuiah a lo awm tawh a, chumi hma daihin MNF Ministry khan hmathlir thui tak lo neiin a venna tur dan 'Restriction of Tranfer of Land' dan a lo siam fel dim diam tawh a, mimalah ram pek a ni dawn lova, sawrkar ramah dah vek a ni dawn a ni,” a ti bawk.

I&PR Minister chuan sawrkar thar in hma a lakna hrang hrangte pawh sawiin, Ration Chini chu Ration Card nei mi nuai 10 chuang hnenah April thla a\anga sem chhuah hman turin Cabinet thutlukna angin a changtu Minister-in rua-hmanna a siam ta mek tih a sawi a. “Hetianga kan kal tluan chhoh zel chuan kum 20 chhung sawrkar hi kan vision a ni ta,” a ti bawk.