Inthlang turin inbuatsaih

Lawngtlai District chhunga Lai Autonomous District Council (LADC) leh Chakma Autonomous District Council (CADC)-a Village Council inthlanpui neih tur atan inbuatsaihna ngawrh taka kalpui mek a ni a, niminpiah khan Final Electoral Roll pawh tlangzarh a ni.

Ruahman lawk dan chuan kumin March thla hian LADC huam chhunga Village Council awm zawng zawng 95-ah inthlanpui buatsaih a ni anga, CADC huam-chhunga Village Council 6-ah by-election buatsaih a ni bawk ang.

Nimin khan Lawngtlai District Election Officer, Pi Shashanka Ala hovin heng inthlanna neih tur inpuahchahna tur leh thil \ul hrang hrang sawihona chu DC’s Conference Hall-ah neih a ni a, he hunah hian DEO chuan Village Council inthlan hun atan March ni 12 ruahman chhin a nih thu leh February ni 22 hian State Election Commission (SEC) a\angin tihchian a nih dawn thu a sawi a. Political party leh tlawmngai pawl te chu inthlan felfai leh thianghlim tak a awm theih nan theihtawp chhuaha hma lakpui atan a sawm a. Village Council-te chu mipui nena inhnaih ber leh hmasawnna hna hrang hrang a taka thawktu ber an nih avangin an pawimawh em em a, inthlan pawh fimkhur taka kalpui a \ul a ni, a ti.

LADC huamchhungah hian Polling Station 95 awmin, Station tinah Polling Booth pakhat \heuh a awm a. Final Roll-a a lan danin, he'ng Polling Station 95-ahte hian voter mipa 24,105 leh hmeichhia 25,020, an zavaiin voter 49,125 an awm a. Draft Roll tlangzarh hnua thun belh 5451 leh paih 2106 awmin, Draft Roll aia a punna hi voter 3345 a ni. CADC hnuaia by-election neihna tur Village Council paruk (6)-ah chuan voter mipa 2943 leh hmeichhia 2305, an vaiin 4648 an awm a. Draft Roll-a thun belh 312 leh paih 5 awmin, Draft Roll a\anga a punna hi voter 307 a ni.