Category-I chungchang Law Minister sawipui

MZP General Hqrs. hruaitute chuan nimin khan Law Minister, TJ. Lalnuntluanga chu a Pisa-ah kawmin Mizoram quota-a Technical course zir tur lak dan chungchanga Mizoram Chakma Students’ Union ten Gauhati High Court-a Mizoram sawrkar an khinnaa Mizote duhloh dana rorel a nih chungchang an sawipui a.

MZP hruaitute chuan Court-in engtin pawhin ro lo rel se Chakma-te chu Mizoram leilung fa an nih loh avangin Technical Course zir tur thlannaah pawh Category I-ah an awm tur a ni lo tih chu MZP ngaihdan a nih thu an sawi a ni. Chakma zirlaite’n High Court-a Mizoram sawrkar an khinna chungchang hi Inrinni khan MZP chuan Emergency Meeting kovin a lo ngaihtuah tawh a, Chakma zirlaite hi ram leilung fate awmna category-ah an awm tur a ni lo tiin thuneitute rawn kual nise an lo ti tawh a ni.

Nimin a Law Minister an kawmna hunah hian MZP-in hun rei tak sawrkar a lo ngen tawh, Lok Ayukta chungchang pawh sawipuiin Law Minister chuan corruption dotu tur Lok Ayukta hi din thuai tum a nih thu a sawi a, tihfel ngaite tihfel thawkhat a ni tawh tih sawiin, Assembly Session paltlang a ngaih avangin Session lo awm turah putluha din theih mai a nih tur thu MZP hruaitute a lo hrilh a. MZP chuan Lok Ayukta din tura Minister leh sawrkar hmalakna ah lawmthu an sawi bawk.