Latest News

Mizoram ramri-ah sipai tam zawk dah tum a ni

MZP General Headquarters hruaitute chuan nimin khan Home Minister, Lalchamliana chu a Office-ah an hmu a, pawl hmalakna hrang hrang bakah Inner Line Permit (ILP), Mizoram ramri leh Rel lo luh huna Zofate himna tur atana lo inven dan tur chungchangte an sawiho.
MZP hruaitute chuan Home Minister hnenah hian hnamdang laka Mizote an him theihna tura hman mek, Inner Line Permit (ILP) chu a enkawltu tura ruatte an inthlahdah \hin avang leh fimkhur tawkloh avangin, Mizoram mipui ten kawng tam takah harsatna a tawh \hin thu an sawi a. ILP chu tun aia kalphung felfai leh hnamdang sponsor-tute pawhin an mawhphurhna an hlen theih dan tur te, ILP pekchhuahte pawh an permit thih huna an awmna chin leh khawsak dante hriat zui zel theihna tura tan computerize vek turin Home Minister hi an ngen a ni.
MZP hruaitute chuan, Mizoram ramri chu tun aia ven uluk ngai an tih thu te, \henawm State Sawrkar ten an nek nasat dan leh pi leh pu te ram chin Mizoram in chan hret hret dan te an sawi a. Tun aia nasa zawka ramri venhimhna hna thawk turin ramri-ah Sipai dah belh leh khauhzawka dan lova Mizoram-a lo lut te dapchhuah a \ul thu Home Minister hnenah an thlen bawk.
MZP chuan kum 2020-ah chuan Mizoram chhungah Rel lian a lo lut dawn nia sawiin, khawvel changkanna anih rualin Mizoram chhunga chengte tan a him tawkloh dan kawng tam tak a awm tih an sawi a. Nitin hnamdang sang chuang lo lut reng tawh tur a ngaih anih avangin ram leh hnam chimrala a awmlohna turin ruahmanna felfai tak siam turin Mizoram Home Minister a ngen bawk.
MZP te thil thlen chungchang hi chhangin Home Minister chuan, Assam leh Mizoram ramri chungchanga buaina awmte sukianga ngaihtuah zuitu tur Core Committee thar din turin Chief Minister lo sawipui a tum thu a sawi a, remchang hmasa berah Zophai pawh MZP hruaitute nen tlawh tura ruahman a tum thu a sawi a. Ramri venhim a ngaihpawimawh thu sawiin, ILP pawh tun aia kalphung tha zawk hman a nih theih nan hmalak a tum thu te, ramri venghim turin ramriah sipai tam zawk dah a tum bakah Mizoram-a Rel lian a luh hunah pawh ILP check post changtlung tak siam a nih tur thu MZP hruaitu te a lo hrilh a ni.

Comments

Popular News (Last 30 Days)