Tripura Camp-a awm te March 31 hmaa let turin ti

Tripura Bru Relief Camp 6-a Mizoram mi awmte chu kumin March ni 31 hma a Mizorama let tura hriattir an ni.

Hemi chungchanga hriattirna hi Union Home Ministry chuan tunthla ni 11 khan a chhuah a, he lehkha vekah hian Tripura Bru Relief Camp 6-a awmte Ration leh \anpuina sum dawn \hin, Cash dole tia hriatte pawh kumin March ni 31 thleng pek chhunzawm an nih dawn thu tarlan a ni. Mizoram Bru Displaced People Forum (MBDPF) hruaitute hi an President, A. Sawibunga hovin tunlai hian New Delhiah an cham meka, nimin zing khan Mizoram House, Chanakyapuri-ah Chief Minister, Zoramthanga hmuin an thilphut leh Mizoram-a an let leh theih dan tur leh an mamawh dangte an sawipui a, hemi hnua MBDPF hruaitute hnen a\anga thu dawn danin Zoramthanga chuan Mizoram mi dik tak, Tripura Bru Camp-a awmte Mizorama an haw theih dan tur chungchanga thil tih \ulte chu ngaihtuah zui zel a nih dawn thu a lo hrilh niin an sawi a ni.

MBDPF hruaitute hian nimin leh niminpiah khan New Delhi-ah MHA Adviser (Bru), Mahesh Kumar Singla an hmu a, Mahesh Kumar Singla chuan Mizoram-a an letna tur hun Sawrkar laipui a pawhsei sak, kumin March ni 31 hma ngaia Mizoram-a let turin Bru hruaitute chu thurawn a pe a ni. MBDPF hruaitute hian tunhnai khan Prime Minister, Narendra Modi hnenah Memoramdum thehlutin an thilphut chi hrang hrang an tarlang a, chung zingah chuan Tripura Camp-a awm Mizoram mi, tun thlenga an nihna la enfiah loh mi 1000 vel la awm enfiaha, Electoral Roll-a thunte leh nikum September thla a Electoral Roll ennawnna a hmaih \helh awmte thun thar an dilna te a tel a ni. MBDPF hian Election Commission-ah pawh hetiang bawk hian ngenna an siam a ni.