Mizoram Larsap hovin Aizawl-ah Republic Day vawi 70-na hman a ni

India Republic Day vawi 70-na chu Inrinni khan Aizawl-ah Mizoram Larsap, Kummanam Rajasekharan hova hman niin Larsap hian Hnam Puanzar a pawtpharh a. He hunah hian Chief Minister, Minister, MLA leh Sawrkar Official tlemte bak an tel lova, silai keng chi Sipai leh Police tih loh School naupangte pawh Parade-na ah an tel lo a ni.

Aizawl Sipai Lammual-a India Republic Day vawi 70-na lawmna ah hian Larsap, Kummanam Rajasekharan chuan India Hnam puanzar a pawrparh hnuah Parade contingent-te endikin Parade Contingent 9 ten Hnam Puanzar chibai an bûk a chháng lêt a. Hemi hnu hian mipuite hnenah thuchah sawi zuiin Larsap chuan Zoram mipuite zawng zawng te duhsakna chibai bukin, Kum 70 liam ta ah khan India ram chu mipui rorelna ram, Danpui ropui tak hnuaiah mitin intluk tlanga chanvo inang an neih theihna leh a innghahna atan dikna, mimal zalenna, intluktlanna leh inunauna te lungphumah neiin ‘democratic republic’ ram pakhat ni turin a lo inbawl hrang \an tih a sawi a. Tun dinhmun kan thlen theihna tura theihtawp lo chhuahtu India ram leh hnam hruaitu hmasa mual liam tawh te kha rilru-ah hre rengin anmahni zahna chibai i buk ang u, tiin mipui a sawm a ni.

Larsap chuan sawrkar in Mizoram chu mahni kut-kea ding a, intodelh turin ruahmanna hrang hrangte siamin chak taka kalpui a tum thu a sawi a. Sawrkar langtlang leh mawhphurhna la ngam, mipuite innghahna tlak sawrkar ni turin theihtawp a chhuah dawn tih sawiin, Sawrkar inrelbawlna kawngah thuneihna sem zai tur leh a taka Lok Ayukta kalpui thuai turin hmalak tum a nih thu a sawi a. Hnam pasal\ha, ram tana nun hlante hriatreng nan an chhungte chhawmdawlna tur ruahmanna pawh a bika siam sak tum a nih thu a sawi bawk.

Hmasawnna huapzo leh ngelnghet, khawngtlang mipuite dinhmun leh ei leh bara ram hmel thlak danglamna turin ruahmanna lian tham, Socio-Economic Development Policy (SEDP) a kalpui dawn a ni tih sawiin Larsap chuan, “SEDP chu ramin chakna thahrui a ngahna tihchak lehzualna tur a ni a. Sum sem ringawt a ni dawn lova, project belhchian dawl leh eizawnna tura ruahmanna rintlak siamtute kut tihchakna tur a ruahman a ni dawn a ni,” a ti a. Kum khata mimal sum thawhchhuah zat pawh rampum huapa mimal thawhchhuah zat aia sanga awm chhun-zawm zel theih nan theihtawp chhuah a nih tur thu sawiin, sawrkar hmasa hun chhunga hmalakna te pawh a\ul dan ang zelin a theih chinah chuan chhunzawm a nih dawn thu a sawi bawk.

Sawrkar chuan thingtlang mipui nawlpui leh kuthnathawktu tam zawkte eizawnna ber, Agriculture a ngai pawimawh chhunzawm dawn tih sawiin Larsap chuan, He sector pawimawh tak huangah hian tunlai thiamna sang ber ber leh thlai thar hlawk dante pawh kalpui tum a nih thu leh Horticulture, Fisheries, Veterinary and Animal Husbandry leh Sericulture-ah te hlawkna tak tak thawhchhuah tumin kut thlak nasat bik a nih dawn thu a sawi a. Sawrkar chuan state chhung inkalpawhna kawngpui \ha nei tur leh state \henawm te nen inkalpawhna tura kawngpui \ha nei turin theihtawp chhuah a tum thu sawiin, a \ul a piang chu a ti zel dawn tih a sawi bawk.

Heng bakah hian Larsap chuan kumin chhunga State fai ber nih tum a nih thu te, The Mizoram State Health Care Scheme pawh ennawn a, siam\hat ngai laite siam\hain kalpui a nih zel dawn thu te, Zu khapna Dan siam a nih thuai tur thu leh The Mizoram Liquor (Control & Prohibition) Act, 2014 pawh \hiah a nih theih nan a \ul ang angte tih a nih tur thu te a sawi a. Olympic Games kalphung leh inrelbawl dante behchhanin Sports Policy thar pawh siam thuai tum a nih thu pawh sawiin, khua leh tui chhuanawm tak ni mek Mizoram mipuite chu ram Danpui-a inziak - khua leh tui mawhphurhna zawng zawng leh a dangte chu chanvo leh mawh ah la thar leh \heuh turin a sawm bawk.