Mizoram-ah Petrol Pump 47 hawn belh tum niin Serchhip District-ah 3 hawn belh tum a ni

Indian Oil Corporation (IOC) Limited Manager, Akhil Paul-a chuan Mizoram mipuiten hnianghnar zawka tuialhthei an hmuh theih nan Mizoram-ah Petrol Pump 47 hawn belh tum a ni tih a sawi a, Petrol Pump Dealer ni duh tan dilna hun hawn mek a nih thu a sawi bawk.

Inrinni kaltaa Aizawl Press Club-a thuthar thehdarhtute a kawmna hunah Indian Oil Corporation (IOC) Limited Manager, Akhil Paul chuan he thu hi sawiin Mizoram-ah mipui ten hnianghnar zawka Tuialhthei an dawn theih nan IOCL chuan kawng hrang hranga hma a lak thu an sawi a. He an hmalakna pakhat atan hian Mizoram-ah Petrol Pump 47 hawn belh tum a nih thu hi sawiin, Petrol Pump hawn belh tura ruahman te hi Aizawl District-ah 14, Mamit District-ah 8, Kolasib District-ah 6, Serchhip District-ah 3, Lunglei District-ah 4, Lawngtlai District-ah 4, Champhai District-ah 7 leh Siaha District-ah 1 a ni tih a sawi a, heng Petrol Pump hawn belh tura Dealer ni duhte tan hian tun thla ni 12 thleng IOCL Company-ah dilna thehluh theih a ni tih a sawi a. Diltu chu India khua leh tui, pawl 10 pass a ni tur a ni a, hetiang mi tu tan pawh dil theih a ni tih an sawi bawk.
Thuthar thehdarhtute an kawmna hunah hian IOCL hotute chuan, sawrkar laipuia Petroleum and Natural Gas Ministry-in ‘Pradhan Mantri Ujjwala Yojana’ (PMUY) hnuaia ram chhunga BPL chhungkuaa hmeithai zawng zawngin Gas Connection an neih vek theihna atana hmalakna pawh chak taka kalpui mek zel a nih thu sawiin, he hmalakna ah hian kumin March ni 19 hmaa LPG Connection vbc. 5 pekna atan cheng  vcb. 12,800 ruahman a ni tih an sawi a, hei bakah hian kum 2020 March thla hmain LPG connection vbc. 3 pekchhuah hman tum a ni a. He hmalakna tur hi Prime Minister in kum 2016 May ni 1 khan Uttar Pradesh-a Balia hmunah a lo hawng tawh tih sawiin, hemi hnuaiah hian IOCL pawhin chak takin hma lain, hawn a nih a\anga nikum December ni 15 thleng khan LPG Connection vbc. 2.75 pekchhuah tawh niin, he hmalakna hnuaia ram puma LPG Connection pekchhuah zat chu vbc. 5.8 a tling tawh tih an sawi bawk.
Inrinni-a IOCL hotu ten thuthar thehdarhtute an kawmna hunah hian IOCL Mizoram Retail Sales Assistant Manager, Vishal Alok leh Sales Officer, Martin Gangte te pawh an tel a ni.

Popular posts from this blog

PAN CARD an tih teh fo hi - Laldinpuia